VOV4.Jarai-Ƀơi Hà Nội, Khul đah kơmơi ngă bruă sĭ mơdrô Việt Nam ngă hrom Anom bruă mơ̆ng Sang gum hơbit djop dêh čar wai lăng tơlơi bơkơnar đah rơkơi hăng đah kơmơi laih anun Jao tơlơi dưi kơ đah kơmơi iâu klah čun UN Women, pơphun jơnum pơčrông sai bruă đah kơmơi ngă khua anom bruă sĭ mơdrô ƀơi Việt Nam thun 2021 hăng pơtruh nao rai mơ̆ng 40 bit anih pơdah rup lăng nao rai amăng tivi jơnum mơ̆ng ataih, ƀrô hơdor glăi hrơi Mơnuih ngă bruă sĭ mơdrô Việt Nam lơ 13/10, Hrơi pơpŭ kơ đah kơmơi hrơi Việt Nam lơ 20/10 laih anun hơdor glăi 20 thun akŏ pơjing khul đah kơmơi ngă khua anom bruă sĭ mơdrô.

Jơnum pơčrông sai thun anai, hơmâo akŏ ñu Pơblih mrô: Mơ̆ng tơlơi thâo hluh truh kơ bruă ngă, kiăng kơtưn tơlơi dưi ngă bruă bơwih ƀong huă mơ̆ng ƀing đah kơmơi, kơnang kơ anom bruă sĭ mơdrô yua kơ đah kơmơi ngă khua, ngă pô pơblih hơdră mrô, rŭ glăi tơlơi bơwih ƀong huă, bong kjăp amăng rơnuk hơkrŭ đĭ Tuh tia pơkra pơjing măi mok 4.0 laih anun lơ̆m rơnuk klin kheng covid 19 hlăk ƀă hyu tơnap tap amăng rŏng lŏn tơnah laih anun ƀơi Việt Nam.

Ƀơi mông jơnum, ƀing khua mua lu anom bruă, ƀing ngă bruă sĭ mơdrô hơmâo pơčrông sai tong ten bruă pơblih bruă ngă tui mrô hăng tơlơi dưi mơ̆ng ƀing đah kơmơi ngă khua sang sĭ mơdrô; hơdôm gơnam mă yua, tơlơi bơwih bơwang, atur ngă bruă hăng mrô pioh mă yua kơ anom bruă pô amăng rơnuk klin kheng covid 19; hơdră pơphun ngă bruă pơblih hăng mrô brơi kơ djop sang bruă sĭ mơdrô anet hăng man ƀrô; hơdră pơphun sĭ mơdrô sit pơblih ngă bruă hăng mrô ƀơi djop sang bruă sĭ mơdrô.

Nay Jek: Pơblang