VOV4.Jarai - Mơguah lơ 21/7, Jơnum min apăn bruă Khua pơ ala mơnuih ƀon sang dêh čar  lăi pơthâo boh tơhnal pơčrông sai amăng grup hăng lăi glăi tơlơi tơña, hmư̆ tơlơi pơgôp hiăp mơng Khua mua kơ bruă ruah mơnuih apăn bruă hlâo kơ Khua pơ ala mơnuih ƀon sang dêh čar pơčrông sai, pơsit dong yua ƀing tơbiă anăn hlâo kơ ruah khua čih pioh Khua pơ ala mơnuih ƀon sang dêh čar, Khua Jơnum min djuai ani, Khua Jơnum min Khua pơ ala mơnuih ƀon sang dêh čar, Khua anom bruă jŭ yap ngăn drăp kơnuk kơna.

Khua git gai Ping gah ơi Nguyễn Phú Trọng hăng Khua mir sir ơi Nguyễn Xuân Phúc plĕ hră amăng jơnum blung a, Khua pơ ala mơnuih ƀon sang dêh čar tal XV

Laih dong, khua mua pơ ala mơnuih ƀon sang dêh čar amra ruah hluai tui hơdră plĕ hră hơgŏm. Mrô hră plĕ amra lăi pơthâo amăng hrơi tơdơi anun. Ăt amăng hrơi mă bruă tal 2, ƀing khua mua pơčrông sai kơ Jơlan hơdră krăo lăng mơng Khua pơ ala mơnuih ƀon sang dêh čar thun 2022, Jơlan hơdră čih pơkra tơlơi phiăn amăng thun 2022, čih pơkra ming Jơlan hơdră pơjing tơlơi phiăn, tơlơi pơsit thun 2021.

Siu Đoan: Poblang