VOV4.Jarai-Mơguah lơ 28/9, hơmâo pơphun pơplông tal rơnuč hăng ƀơk pri kơ  Hlăk ai Pơčeh phrâo yua kơ ayuh hyiăng 2021 tui hơdră lăng nao rai amăng tivi. Tal pơplông “Hlăk ai thâo pơčeh phrâo yua kơ ayuh hyiăng” dưi pok pơhai mơ̆ng lơ 28/5/2021 pioh kơ abih bang mơnuih ƀôn san Việt Nam dŏ amăng dêh čar, mơnuih mơ̆ng 16 thun truh 25 thun, yua kơ Anom bruă Khul tơdăm dra rơnuk Hồ Chí Minh dêh čar ngă hrom Hơdră bruă Pơđĭ kyar mơ̆ng Sang gum hơbit djop dêh čar ƀơi Việt Nam pơphun.

Khul khua mua čom puăng apah bơni jao pri kơ ƀing hơmâo mă pri

Boh yôm phun pơplông anai ƀing hlăk ai pơčeh phrâo  hơduah ĕp tơlơi thâo kơ ayuh hyiăng; hơdră ngă bruă kiăng pơhrŏ ƀiă tơlơi sat răm yua anŏ pơblih ayuh hyiăng ngă ƀudah plai ƀiă ngă rơpih anŏ gôm pơ-iă yang hrơi mơ̆ng adai rơngit. Tơdơi kơ sem lăng hăng ruah mă, khua mua čom puang hơmâo tŭ mă 10 tơlơi pơplông, jing 10 mơta tơlơi pơčeh phrâo lăp hloh kiăng ba pơplông tal rơnuč.

Ayong Nguyễn Văn Hiển, dŏ mă bruă pơ puih kơđông tơhan pơgang guai Sipa Phin, gah anom bruă tơhan pơgang guai dêh čar tơring čar Điện Biên tŭ mă pri sa prong hloh, hơmâo hră apah bơni mơ̆ng Anom bruă Khul tơdăm dra rơnuk Hồ Chí Minh dêh čar hăng rơnoh prăk djru kiăng ngă tui anŏ pơčeh phrâo mơ̆ng ñu lĕ 50 klăk prăk.

Nay Jek: Pơblang