VOV4.Jarai - Lơ 27/9, ƀơi Ƀirô Khua pơ ala mơnuih ƀon sang dêh čar pơphun jơnum bơkơtuai hăng ƀing rơgơi gah bơwih ƀong huă - mơnuih mơnam. Amăng mông jơnum hơmâo giăm 80 čô khua mua mơng djop Ding jum, gơnong bruă, khul grup amăng jar kmar, ƀing rơgơi kơhnâo gah bơwih ƀong huă. Amăng mông jơnum bưp ƀơi anăp hăng lăng nao rai mơng ataih. Đĭ pơhiăp amăng mông jơnum, Kơ-iăng Khua pơ ala mơnuih ƀon sang dêh čar ơi Nguyễn Đức Hải lăi pơtong, hơdôm tơlơi pơgôp hiăp amăng jơnum anai lĕ tơlơi pơlăi nao rai yôm phăn kiăng kơ Khua pơ ala mơnuih ƀon sang dêh čar pơsit hơdôm bruă yôm phun amăng lŏn ia kơ bơwih ƀong huă - mơnuih mơnam; jơnum ăt lĕ hrơi mông kiăng kơ ƀing rơgơi kơhnâo, khua mua git gai lăi pơthâo kơ bruă mă, ngă pô hăng lu mơta tơlơi pơmĭn, kiăng pơjing hơdră pơđĭ kyar bơwih ƀong huă, mơnuih mơnam hơđong kjăp. Ƀing rơgơi kơhnâo, djop ding jum, gơnong bruă pơgôp kơ bruă amăng lŏn ia, hrơi blan ngă pơgiong akŏ bruă pơđĭ kyar bơwih ƀong huă-mơnuih mơnam 4 blan rơnuč thun 2021, đơ đam thun 2021 hăng akŏ bruă amăng thun 2022.

Siu Đoan: Pơblang