VOV4.Jarai - Hơdor glăi 110 thun hrơi tơkeng Đại tướng Võ Nguyên Giáp, ƀơi tơring čar Cao Bằng pơphun hăng lu bruă mă sit nik, yôm phăn. Mơguah lơ 24/8, ƀơi anih djă pioh gru grua yôm phăn ƀơi đang glai Trần Hưng Đạo (să Tam Kim, tơring glông Nguyên Binh), tơring čar Cao Bằng hơmâo pơphun tŭi ñang, dưm guang bơnga ƀơi pra yang Đại tướng Võ Nguyên Giáp.

Jơnum bơkơtuai hăng anăn “Đại tướng Võ Nguyên Giáp hăng plơi pla ngă hơkrŭ Cao Bằng”

Tơdơi kơ mông dưm guang bơnga, tŭi ñang, ăt ƀơi anih djă pioh gru grua yôm phăn Đang glai Trần Hưng Đạo, tơring čar Cao Bằng pơphun jơnum bơkơtuai hăng anăn “Đại tướng Võ Nguyên Giáp hăng plơi pla ngă hơkrŭ Cao Bằng”. 25 tơlơi čih mơng ƀing khua mua pơgôp ngă rơđah dong tơlơi gum pơgôp mơng Đại tướng hăng bruă ngă hơkrŭ ƀơi Việt Nam, biă mă ñu lĕ rơwang thun 1941-1945, thun blan Đại tướng mă bruă ƀơi tơring čar Cao Bằng. Lu tơlơi čih ăt lăi nao rơđah hơdôm tơlơi gum pơgôp prong prin mơng mơnuih ƀon sang djop djuai anai amăng tơring čar Cao Bằng lơ̆m djru brơi ƀing ƀô̆ đô̆i kah hăng Đại tướng Võ Nguyên Giáp, anih Đại tướng lăng kar hăng plơi pla tal dua.

Siu Đoan: Pơblang