VOV4.Jarai - Mơguah lơ 25/8, Ding jum ling tơhan gum hrŏm hăng anom pơtô bruă Ping gah, anom bruă Kơnuk kơna hăng Ping gah tơring čar Quảng Bình pơphun jơnum lăng nao rai mơng ataih Jơnum bơkơtuai tơlơi thâo thăi gưl dêh čar pioh hơdor 110 thun hrơi tơkeng Đại tướng Võ Nguyên Giáp. Jơnum bơkơtuai hăng anăn “Đại tướng, Khua git gai ling tơhan Võ Nguyên Giáp - sang čô mơnuih rơgơi kơhnâo, khua git gai  thâo bruă ngă hơkrŭ Việt Nam”.

Jơnum bơkơtuai tơlơi thâo thăi gưl dêh čar ƀơi anih lăng nao rai mơng Quảng Bình

Đĭ pơhiăp amăng mông git gai Jơnum bơkơtuai lăng nao rai mơng ataih ƀơi sang jơnum Ding jum ling tơhan ƀơi Hà Nội, Đại tướng Phan Văn Giang, Ding kơna Ding jum kơđi čar, Khua ding jum ling tơhan lăi pơtong: “Jơnum bơkơtuai anai lĕ sa amăng hơdôm bruă prong, yôm phun, sit nik amăng hơdôm bruă pioh hơdor glăi 110 thun hrơi tơkeng Đại tướng Võ Nguyên Giáp. Hơdôm tơlơi čih hăng tơlơi pơgôp hiăp amăng jơnum anai amra pơhrua dong hơdôm tơlơi pơhing, hră pơ-ar kiăng lăng glăi tong tong tơlơi hơdip, bruă djru hơkrŭ yôm phăn mơng Đại tướng Võ Nguyên Giáp; pơpŭ bơni hơdôm tơlơi pơgôp prong prin mơng ñu amăng thun blan ngă hơkrŭ mơng Ping gah hăng djop djuai ania. Pơgôp ba glăi tơlơi đăo gơnang mơng mơnuih ƀon sang amăng rơnuk pơplih phrâo lŏn ia yua Ping gah ta pơphun hăng git gai.

Siu Đoan: Pơblang