VOV4.Jarai-Rơwang hrơi tơjuh rơgao, Jơnum lok ƀu pơkă hlâo khua mua pơ ala mơnuih ƀôn sang dêh čar tal 15 tui hơdră lăng nao rai amăng tivi hăng 62 boh tơring čar, ƀôn prong. Jơnum lok anai sem glăi, pơsit lu bruă mă, tơlơi kiăng yôm ječ ameč bơwih ƀong huă, mơnuih mơnam, prăk kăk, prăk kơnuk kơna pioh djru hmao kru kơ Hơdră pơhlôm, pơgang klin Covid 19 laih anun hơdră rŭ glăi tơlơi bơwih ƀong huă mơnuih mơnam.

Boh yôm phun blung a lĕ ƀing pơ ala mơnuih ƀôn sang dêh čar ta pơtum lăi nao amăng mông jơnum lok ƀu pơkă hlâo tal 15 anai, anun lĕ: sem glăi pơsit hĭ Hră pơtrun jơnum tal anai kơ bruă prăk kăk, pơblih prăk kăk djru tuh pơ alin kơ Hơdră rŭ glăi hăng pơđĭ kyar bơwih ƀong huă-mơnuih mơnam. Hră pơtrun jơnum yôm biă mă pioh bong glăi hăng klin Covid 19, rŭ glăi anih nao mă bruă apah, pơsir tơlơi ƀong huă kơ mơnuih mơnam, pơgang tơlơi hơdip ană plơi pla. Anai yơh boh yôm phun mơnuih ruah khua amăng dêh čar hăng mơnuih ƀôn sang dêh čar ta đing nao. Mơnuih ƀôn sang ruah khua Nguyễn Văn Huy, dŏ pơ plơi prong Yên Bái, tơring čar Yên Bái lăi:

“Kâo hok mơak biă mă jơnum lok anai khua mua pơ ala mơnuih ƀôn sang pơsit lu bruă yôm kơ lŏn ia, boh nik ñu pơdjơ̆ nao kơ klin Covid 19. Jing sa čô mơnuih ƀôn sang pô ruah khua dŏ ƀơi kual Čư̆ siăng, kâo ƀuh tơlơi git gai djơ̆ biă mă, hmao kru mơtam mơ̆ng khua pơ ala mơnuih ƀôn sang dêh čar, kơnuk kơna dêh čar pơtrut bruă pơhlôm, pơgang klin, biă mă ñu pơblih hơdră pơhlôm, pơgang klin jing dŏ hrom bong glăi klin beč bal, ĕp lăng tŭ yua hăng hơđong amăng hrơi blan klin Covid 19 aka ƀu abih. Kâo ăt čang rơmang pơ anăp anai, khua mua pơ ala mơnuih ƀôn sang, kơnuk kơna dưi ĕp lăng, pơtrut klă hloh pok pơhai ngă tui Hră pơtrun jơnum, Hơdră pơsir tơlơi răm ƀăm, rŭ glăi bơwih ƀong huă mơnuih mơnam, pơsir lu bruă kơ mơnuih ƀôn sang kiăng”.

Mông jơnum abih bang ƀơi sang jơnum prong khua pơ ala mơnuih ƀôn sang dêh čar

Kơ tơlơi ječ ameč yôm biă mă jơnum lok anai, Khua čih pioh, Khua anom bruă pơ ala mơnuih ƀôn sang dêh čar, ơi Bùi Văn Cường brơi thâo: Kiăng djru hrom rŭ glăi, pơtrut tơlơi bơwih ƀong huă mơnuih mơnam, tal jơnum lok ƀu pơkă hlâo anai, dưi pơphun kiăng pơsir hmao kru prăk kăk či yua, prăk djru pok pơhai hơdră rŭ glăi hăng pơđĭ kyar bơwih ƀong huă mơnuih mơnam, pơsir hơdôm tơlơi dŏ gun amăng tơlơi phiăn ngă gêh găl tuh pơ alin pơđĭ kyar:

“Jơnum lok anai ječ biă mă yua dah ƀing ta kiăng hơmâo sa tơlơi pơtrun pơdjơ̆ nao rŭ glăi hăng pơtrut bơwih ƀong huă. Yua kơ anun prăk kăk, bruă prăk kăk yơh yôm biă mă pioh rŭ glăi pơđĭ kyar bơwih ƀong huă. Tơdah hơmâo pơsit amăng hơdôm hrơi akŏ thun 2022 lĕ amra pơtrut pơđĭ kyar amăng thun 2022-2023 hăng abih rơwang bruă. Anun yơh anŏ kiăng biă mă, ječ ameč mơ̆n. Tơdah truh jơnum lok 5 lĕ amra kaih hloh 5 blan kah dưi pơsit hĭ”.

Ƀơi mông jơnum anai, khua mua pơ ala mơnuih ƀôn sang dêh čar sem glăi, pơsit 8 mơta tơlơi phiăn kah hăng: tơlơi phiăn čih pơkra glăi, pơhrua nao dơ̆ng Tơlơi phiăn Tuh pơ alin kơ bruă čar, Tơlơi phiăn tuh pơ alin tui hơdră kơnuk kơna ngă hrom hăng bơnah pơkŏn, Tơlơi phiăn tuh pơ alin, Tơlơi phiăn juă nua, Tơlơi phiăn apui lơtrik, Tơlơi phiăn anom sĭ mơdrô, Tơlơi phiăn duh jia pơhrui prăk lu hăng Tơlơi phiăn ngă tui kơđi mơnuih ƀôn sang laih phat giong.

Khua mua pơ ala ƀơi tơring čar Dak Lak pơgôp hiăp kơ boh yôm phun

čih pơkra glăi 8 tơlơi phiăn

Bơkơtuai hrom amăng mông jơnum, Grup khua mua pơ ala mơnuih ƀôn sang ƀơi Dak Lak tŭ ư hrom anŏ pơblih čih pơkra pơhrua tui dơ̆ng hơdôm mơta tơlơi amăng 8 tơlơi phiăn, kiăng ngă tui djop mơ̆ng jơlan hơdră, tơlơi pơtrun mơ̆ng Ping gah laih anun pơsir hmao kru hơdôm tơlơi tơnap tap, dŏ gun amăng tơlơi phiăn đah mơ̆ng djơ̆ hăng tơlơi dŏ dong ƀong huă rĭm hrơi.

Pơgôp hiăp kơ Tơlơi phiăn tuh pơ alin bruă čar, Y Vinh Tơr, Khua grup pơ ala mơnuih ƀôn sang dêh čar ƀơi Dak Lak tŭ hăng 3 mơta boh yôm phun čih pơkra pơhrua nao dơ̆ng tơlơi phiăn, samơ̆ ñu rơkâo djru hloh bruă pơpha tơlơi dưi, tơlơi gơgrong ba mă yua prăk čan hơdôm kơčăo bruă ODA:

"Boh yôm phun pơdjơ̆ nao hăng tơlơi pokôl hăng jar kmar, kơlah wah kơnuk kơna Việt Nam hăng anom bruă khua mir sir sit kĭ pơkôl hăng hơdôm bơnah dêh čar tač rơngiao, hơdôm tơlơi pơkă ngă tui boh yôm phun anai. Tơdah pơtong lăng djơ̆ tong ten tơlơi glăm ba mơ̆ng djop ding jum, anom bruă, tơring čar lĕ amăng bruă ngă tui lu soh glăi. Boh nik ñu pơdjơ̆ nao hnong mă bruă, hrơi blan pơkă, boh tŭ yua amra bơbeč djơ̆ prong biă mă kơnuih dêh čar Việt Nam amăng thun blan hlăk mut phung hăng jar kmar”.

Pơdjơ̆ nao tơlơi phiăn ngă tui kơđi mơnuih ƀôn sang giong phat, pô pơ ala Nguyễn Thị Thu Nguyệt lăi lĕ, tơlơi phiăn anai kiăng ngă rơđah hloh tơlơi pơtrun kơnang kơ bruă, jao ngă brơi:

“Ƀơi mơta tơlơi 55 pơkă čih glăi anăn tơlơi phiăn lĕ jao ngă brơi ngă tui kơđi laih phat hăng jao tơlơi dưi pơsir brơi gơnam hơmâo kơđi, aka ƀu lăi rơđah ôh jao tơlơi dưi ngă tui hăng tơlơi kơnang pơsir brơi gơnam hơmâo kơđi phara tơlơi pơkă pơpă ôh, tui anun kâo rơkâo kơnuk kơna kiăng pơkă tum teč rơđah hloh kơ tơlơi jao arăng pơsir brơi gơnam hơmâo kơđi anun hiư̆m thơ rơđah rơđong”.

Sa mơta boh yôm phun pơkŏn dơ̆ng, ƀing pơ ala sem glăi, pơsit tal anai Hră pơtrun jơnum kơ Jơlan hơdră tuh pơ alin Kơčăo bruă čuk pơkra jơlan rơdêh đuăi hmar mơ̆ng kual gah Kơdư nao pơ Dơnung jơlan gah ngŏ pơphun mơ̆ng thun 2021-2025.

Khua git gai pơ ala mơnuih ƀôn sang dêh čar, ơi Vương Đình Huệ lăi pơtong, jơlan glông kah hăng arăt drah rô kơ tơlơi bơwih ƀong huă, ngă pơhluh bruă mă, gêh găl kơ bruă pơtrut pơđĭ kyar bơwih ƀong huă-mơnuih mơnam, pơgang rơnuk rơnua dêh čar; pơđĭ kyar jơlan glông, sang bruă kơ mơnuih ƀôn sang sa bruă mă yôm biă mă. Ră anai, tañ pok pơhai kơčăo bruă anai lĕ ƀuh tŭ yua sit nik pơ anăp, pơtrut mă yua prăk kơnuk kơna, rơnoh prăk čan tuh pơ alin rŭ glăi hăng pơđĭ tui hnong bơwih ƀong huă.

Nay Jek: Pơblang