VOV4.Jarai-Mơguah lơ 29/10, ƀơi Hà Nội, pơphun jơnum hơdră bưp nao rai pơƀuh ƀô̆ mơta lăng nao rai amăng tivi kơplah wah khua mua hlăk ai Việt Nam hăng Khač thun 2021. Hơdră anai, hơmâo khua mua pơprong hlăk ai tơdăm dra mut phung rơnuk Hồ Chí Minh Việt Nam, khua mua hlăk ai mut phung dêh čar Khač hăng rơbêh 90 čô hlăk ai tơdăm dra čơđai sang hră gưl prong, ƀing ngă bruă pơtom hiăp ba gru hlâo mơ̆ng dua boh dêh čar.

Hơdră anai, kiăng kơtưn jĕ giăm, bưp nao rai, thâo hluh tơdruă, djru pơtô hrăm hlăk ai dua boh dêh čar djă pioh gru grua giăng mah mơak klă Việt Nam-Khač; pơsit tơlơi kiăng glăm ba hăng pơđĭ tui bruă mă kơsung nao pơ anăp mơ̆ng hlăk ai dua bơnah dêh čar amăng bruă djă lui hăng pơbŭ đĭ tơlơi pŭ ƀăn dua bơnah.

Amăng hơdră anai, ƀing khua mua hlăk ai hur har mơ̆ng Việt Nam-Khač hơmâo lăi pơthâo tơlơi thâo thăi găn rơgao amăng bruă mă gah hlăk ai hăng tơdăm ngek dra muai, boh nik ñu bruă mă pơhlôm, pơgang klin covid 19 ƀơi dua bơnah dêh čar; tơlơi thâo thăi kiăng djru kơ tơdăm dra hlăk ai mut phung jar kmar ră anai.

Nay Jek: Pơblang