VOV4.Jarai-Ƀơi Hà Nội, Anom pơtô bruă ping gah dêh čar, jơnum đơ đam dêh čar lăng nao rai amăng tivi kơ bruă tơlơi pơhing pơtom hiăp; pơtô tơlơi pơhing amăng kual ia rơsĭ, bul plao ia rơsĭ; pong gong pơkă guai dêh čar hăng wai lăng guai dêh čar thun 2021, pok pơhai bruă mă thun 2022.

Ding kơna apăn bruă git gai ping gah dêh čar, Khua anom pơtô bruă ping gah dêh čar, ơi Nguyễn Trọng Nghĩa git gai jơnum. Klah čun amăng mông jơnum, Khua anom pơtô bruă ping gah dêh čar lăi, tơlơi gơgrong jai yôm amăng bruă mă pơtom hiăp, tơlơi pơhing pôr pơthâo kơ ia rơsĭ, bul pơtâo ia rơsĭ. Laih dơ̆ng, brơi thâo ră anai Việt Nam dong tal klâo ƀơi rŏng lŏn tơnah amăng bruă tlâ̆o djop vaccine hmar hloh, amăng boh tơhnal anun djru hrom yua hơmâo tơlơi pơhing pơtom hiăp.

Hăng djop hơdră, pơtrut tơlơi pơhing kơ rŏng lŏn tơnah thâo hluh kơ Việt Nam, đăo kơnang kơ Việt Nam, ngă pơđĭ tui kơnuih hăng rup rap mơ̆ng Việt Nam amăng jar kmar. Kơ bruă mă thun 2022, Khua anom pơtô bruă ping gah dêh čar lăi pơtong, tơlơi pơhing pôr pơthâo, kơ bruă mă pơtom hiăp ăt ngă tui djơ̆ tơlơi kiăng mơ̆ng wa Hồ: pơblih phrâo samơ̆ khom djă kjăp gru grua hiam đưm djuai ania.

Nay Jek: Pơblang