VOV4.Jarai - Mơguah anai (9/12) ƀơi Sang rông Diên Hồng Sang mă bruă Khua pơ ala mơnuih ƀôn sang dêh čar ta gah yŭ tơlơi git gai mơng Khua git gai Ping gah dêh čar ta ơi Nguyễn Phú Trọng, Ding jum kơđi čar, Grŭp git gai bruă Ping gah pơphun jơnum mơnuih apăn bruă đơ đam dêh čar lăi pơthâo pok pơhai Klah čun hăng Tơlơi pơkă mơng Ping gah kơ pơdŏng pơkra Ping gah. Bôh than mơng jơnum lĕ pơtrut kơtang dong bruă pơphun kơsem min, lăi pơthâo abih Klah čun 21 “Kơ pơtrut kơtang pơdŏng, pơplih pơkra Ping gah hăng glông bruă kơđi čar, khom pơgăn pơtrut kơdun pơsir tơpă mơnuih apăn bruă, mơnuih ping gah pơplih ƀu klă tơlơi pơmin kơđi čar, pran jua, jơlan gah hơdip, pơdah mă pô, pơplih mă ha jăn” hăng Tơlơi pơkă 37 kơ “Hơdôm tơlơi ping gah ƀu dưi ngă” mơng Grŭp mă bruă Ping gah dêh čar ta amăng abih bang Ping gah hăng glông bruă kơđi čar mơng dêh čar truh plơi pla, anom bruă. Amăng mông jơnum, Khua git gai Ping gah dêh čar ta ơi Nguyễn Phú Trọng lăi rơđah hăng pran jua lĕ pơtrut kơtang bruă hrưn đĭ, pơsit pran jua pơsir abih ƀing ngă mă ha jăn; ƀu djơ̆ kơnong kơ kơdŏng hưp ƀong kông ngăn ôh mơ̆, khom kơdong glăi wot tơlơi ƀu klă; pơgăn, pơtrut kơdun, khom kơdŏng glăi, pơsir tơpă tơlơi ƀu klă gah tơlơi pơmin bruă kơđi čar, pran jua, jơlan gah hơdip./.

Siu H’ Prăk: Pơblang