VOV4.Jarai - Mơguah lơ 8/10, Sang hră gưl prong pơtô gah bơwih ƀong huă - Sang hră gưl prong Hà Nội gum hrŏm hăng Sang hră gưl prong Hải Phòng, Sang hră gưl prong pơtô sĭ mơdrô hăng wai lăng kual bơwih ƀong huă Hải Phòng pơphun jơnum bơkơtuai hăng anăn “FDI tar ƀar rŏng lŏn tơnah hăng tơlơi pơplih hơdeč hmar mơng anom bơwih ƀong sĭ mơdrô ƀơi Việt Nam pơ anăp anai”. Tui lăi pơthâo rơnoh prăk amăng FDI amăng rŏng lŏn tơnah lăi hrŏm hăng FDI amăng Việt Nam hnun mơn glăk bơbeč nao kơtang mơng klin Covid-19. Samơ̆, rơnoh tuh pơ alin mơng tač rơngiao amăng 9 blan thun anai ăt truh pơ rơbêh 22 klai đôlar Mi, đĭ 4,4% pơhmu tui tơđar thun hlâo. Anai lĕ boh than ba glăi prong prin, pơdah tơlơi đăo gơnang mơng hơdôm anom bruă tuh pơ alin, ruah Việt Nam lĕ dêh čar tuh pơ alin bơwih ƀong huă sĭ mơdrô. Mah tui anun, ƀing khua mua ăt lăi nao hơdôm anŏ aka ƀu klă amăng bruă pơhưč FDI amăng dêh čar amăng thun blan laih rơga: anun lĕ hơƀak jrak, kơƀah apui lơtrik yua, kơƀah prăk kak mơng akŏ bruă FDI. Kơ hơdră pơhưč FDI phrâo pơ anăp anai, ƀing khua mua brơi thâo, dêh čar ta hơmâo hơdôm hơdră klă biă mă, amra bơkơtưn kơtang, kiăng pơhưč tuh pơ alin lu biă dong.

Siu Đoan: Pơblang