VOV4.Jarai - Ƀơi Hà Nội, Đại tướng Phan Văn Giang, Ding kơna Ding jum kơđi čar, kơ-iăng Ping gah ling tơhan dêh čar, Khua ding jum ling tơhan, git gai Jơnum khua ding jum ling tơhan dêh čar blan 7 thun 2021. Đĭ phiăp amăng mông jơnum, Đại  tướng Phan Văn Giang Khua ding jum ling tơhan lăi pơtong kiăng pok pơhai ngă tui hăng pơgiong djop mơta bruă jao amăng blan 8, rơkâo ling tơhan gir run abih pran, ngă tŭ yua amăng sa, dua bruă yôm phăn. Tŏ tui hruă kjăp, ngă tui khut khăt tui tơlơi tơlơi črâo trun mơng Kơnuk kơna, kơtưn amăng hơdôm hơdră pơgang klin Covid-19. Abih bang ling tơhan gum hrŏm kjăp hloh hăng djop tơring čar, biă mă ñu ƀôn prong Hồ Chí Minh hăng hơdôm tơring čar kual gah dơnung amăng bruă pơgang klin, amăng anun đing nao pơhlôm rơnuk rơnua brơi ling tơhan. Djop anom bruă bơdjơ̆ nao git gai ling tơhan pơphun pơtô hrăm kiăng kjăp bruă, lăp djơ̆ hăng tơlơi sit nik amăng pơgang klin; đing nao git gai grup pơplông amăng tal pơplông Army Games thun 2021 kiăng kơ mă pri prong hloh.

Siu Đoan: Pơblang