VOV4.Jarai-Mơguah lơ 6/12, Khua dêh čar ơi Phạm Minh Chính nao jơnum hrom hăng đĭ pơhiăp git gai jơnum khua mua pơprong tơđar tal klâo kơ Boh thâo ia rơgơi măi mok 4.0 hăng akŏ ñu “Rŭ glăi hăng pơđĭ kyar bơwih ƀong huă hơđong kjăp tơdơi kơ rơnuk klin Covid 19 hăng pơtrut kơtang bruă măi mok tuh tia pơkra pơjing, pơblih phrâo lŏn ia amăng rơnuk mă yua mrô tui hơdră bơwih ƀong huă bưp nao rai ƀơi anăp mơta hăng pơtruh nao rai lăng amăng tivi yua kơ Anom bruă wai lăng bơwih ƀong huă ping gah dêh čar git gai”.

Jơnum khua mua pơprong tal anai yôm biă mă kơ bruă kơđi čar, bơwih ƀong huă mơnuih mơnam, djru hrom pok pơhai tŭ yua ngă tui Hră pơtrun Jơnum khua mua ping gah dêh čar ta tal XIII hăng lăi pơthâo mrô rơnoh akŏ pơjing bruă mă, čih pơkra jơlan hơdră tơlơi phiăn pơblih phrâo bruă mă yua măi mok, pơblih phrâo lŏn ia mơ̆ng ră anai truh thun 2030, lăng nao pơ anăp adih truh thun 2045.

Laih dơ̆ng, bruă mă tŭ yua kiăng dăp hơdră, pơkă hlâo jơlan hơdră rŭ glăi bơwih ƀong huă mơnuih mơnam tơdơi kơ rơnuk Covid 19 tui hăng Hră klah čun mơ̆ng Jơnum lok 4 khua mua ping gah dêh čar ta tal XIII laih anun tui hăng tơlơi git gai mơ̆ng kơnuk kơna.

Nay Jek: Pơblang