VOV4.Jarai - Tlam lơ 28/6, Grup khua pơ ala mơnuih ƀon sang dêh čar tơring čar Dăk lăk tal 14 hơmâo jơnum klah čun bruă mă rơwang thun 2016-2021. Grup khua pơ ala mơnuih ƀon sang dêh čar tal 14 mơng tơring čar Dăk Lăk hơmâo 9 čô. Amăng anun hơmâo 4 čô khua pơ ala yua Gơnong dlông pơƀuh anăn, 5 čô yua tơring čar pơƀuh anăn. Mơng akŏ rơwang bruă truh ră anai, grup khua pơ ala mơnuih ƀon sang dêh čar tơring čar hơmâo git gai hăng ngă hrŏm hăng hơdôm anom bruă bơdjơ̆ nao pơphun 20 wơ̆t jơnum mă tơlơi pơgôp hiăp kơ 56 kơčăo bruă Tơlơi phiăn, Hơdrôm tơlơi phiăn. Bruă bưp mơnuih ƀon sang amăng rơwang thun ngă bruă hơmâo ƀing khua pơplih phrâo klă hloh.

Brơi bơnga kơ ƀing khua pơ ala mơnuih ƀon sang dêh čar tơring čar Dăk Lăk tal 14

Grup khua pơ ala hơmâo pơphun 140 tal jơnum pơbưp mơnuih ƀon sang, hăng rơbêh 23.000 wơ̆t čô mơnuih nao pơhmư̆ hrŏm hăng hơmâo 2.950 tơlơi pơgôp hiăp. Hrŏm hăng anun, Grup khua pơ ala mơnuih ƀon sang dêh čar tơring čar Dăk Lăk đing nao bruă djru mơnuih mơnam bơwih ƀong, biă ñu lĕ hăng sang anŏ hơmâo anăn kơnuk kơna djru, sang anŏ djru hơkrŭ lŏn ia, sang anŏ djuai ƀiă tơnap tap kơtang, kual ataih yaih...Amăng 5 thun rơgao, Grup khua pơ ala mơnuih ƀon sang dêh čar hơmâo pơphun hyu čuă jơmư, tơña bla, pơkra sa, dua ring bruă kiăng yua bơwih brơi tơlơi hơdip mơnuih ƀon sang ƀơi anai hăng mrô prăk pioh pơkra rơbêh 6 klai prăk.

Siu H’Mai: Pơblang