VOV4.Jarai - Mơguah lơ 13/12, ƀơi Hà Nội, amăng jơnum kơ bruă pơtom hiăp tal 31, hơmâo pơphun jơnum bruă pơtom hiăp đơ đam dêh čar tal 20, jơnum pơphun lăng nao rai mơng ataih hăng ƀơi anăp, pơlăng nao rai hăng lu anih amăng dêh čar ta hăng tač rơngiao. Jơnum kơ bruă pơtom hiăp đơ đam dêh čar tal 20 lĕ hrơi mông yôm phiăn kiăng djop tơring čar, djop gơnong bruă, anom bruă gơnong glông, djop anom bruă pơ ala brơi dêh čar Việt Nam pơ tač rơngiao hăng hơdôm dêh čar ngă gŏp lăng glăi hơdôm boh than dưi ngă amăng bruă pơtom hiăp ƀơi ƀon lan, ba tơbiă hơdră bruă kiăng kơtưn gum hrŏm , klă dong lơ̆m pok pơhai bruă mă pơ anăp anai. Amăng mông jơnum, Khua ding jum pơtom hiăp Bùi Thanh Sơn lăi pơtong:Dong mơng Jơnum kơ bruă pơtom hiăp đơ đam dêh čar tal 19 thun 2018 truh ră anai, amăng jar kmar hăng amăng kual ƀuh lu tơlơi rung răng. Amăng anun, klin Covid-19 lar hyu giăm 2 thun laih rơgao bơbeč sat nao djop mơta bruă mơng kơđi čar, bơwih ƀong huă-mơnuih mơnam amăng djop dêh čar hăng bruă jơnum pơbưp amăng jar kmar dong. Tui tơlơi git gai khut khăt mơng Ping gah, Kơnuk kơna, tơlơi gum hrŏm mơng djop anom bruă, djop ƀon lan ngă kơ dêh čar ta dưi găn rơgao tơnap tap, tơlơi lông amăng pơgang klin, tŏ tui bruă bơwih ƀong huă-mơnuih mơnam hăng mut hrŏm jar kmar.

Siu Đoan: Pơblang