VOV4.Jarai -  Mơguah lơ 8/10, ƀơi Hà Nội pơphun Jơnum lăng nao rai mơng ataih đơ đam dêh čar Klah čun bruă djuai ania 9 blan akô̆ thun hăng pok pơhai bruă phun 3 blan rơnuč thun 2021. Jơnum hmâo hmư̆ tơlơi gum pơhiăp mơng khua pơ ala hơdôm tơring čar, ƀôn prong hmâo lu neh wa djuai ania ƀiă dô̆ hơdip mơda. Hơdôm tơlơi gum pơhiăp đing nao lăi pơthâo hơdôm bôh than dưi ngă amăng bơwih brơi tơlơi hơdip neh wa, ăt kah hăng pơgang pơgăn, pơtrut kơdun hĭ klin ruă Covid ƀơi kual djuai ania ƀiă, kual čư̆ siăng. Hrom hăng anun, hơdôm tơlơi gum pơhiăp ăt črâo tơbiă mơn hơdôm tơlơi tơnap, tơlơi gun amăng ngă tui hơdră bruă amăng rơnuk phrâo, hrom hăng anun ba tơbiă jơlan pơsir pơtlaih. Pơhiăp amăng mông jơnum, Khua Ding jum Khua Jơnum min djuai ania Hầu A Lềnh brơi thâo, amăng mông klin Covid-19 akă ƀu rơgao, ƀirô mă bruă djuai ania mơng dêh čar truh plơi pla khom gir run ngă tui bruă mă, gum hrom hăng hơdôm bôh ƀirô amăng glông bruă kơđi čar, kiăng hơdră bruă kơ neh wa djuai ania ƀiă hăng kual čư̆ siăng ba glăi bôh tơhnal klă hloh./.

Siu H’ Prăk: Pô pơblang