VOV4.Jarai - Lơ 28/5, ơi Lê Hoài Trung, Ding kơna khul gum bruă Ping gah, Khua anom bruă pơtom hiăp Ping gah hơmâo git gai dua mông Jơnum lăng nao rai amăng tivi lăi pơthâo boh than Jơnum khua mua Ping gah dêh čar tal 13 hăng Ping gah Cộng sản Cuba hăng Ping gah dêh čar Nga pơlir hơbit. Pơhiăp ƀơi dua mông Jơnum anai, ơi Lê Hoài Trung pơsit, Việt Nam lăng yôm hăng čang rơmang ngă dlăm hloh tơlơi ngă hrŏm giăng mah yôm kơplah wah Ping gah Cộng sản Việt Nam hăng Ping gah Cộng sản Cuba laih anun kơplah wah Ping gah Cộng sản Việt Nam hăng Ping gah dêh čar Nga pơlir hơbit. Khua mua dua Ping gah pơsit Ping gah Cộng sản Cuba hăng Ping gah Dêh čar Nga pơlir hơbit lăng yôm biă tơlơi ngă hrŏm hăng Ping gah Cộng sản Việt Nam, lăng anun lĕ bruă čar yôm pơtrut đĭ, ngă dlăm hloh tơlơi rô nao rai giăng mah pŭ ƀăn kơplah wah Việt Nam hăng Cuba hơmâo Khua mir sir Hồ Chí Minh, Khua hơkrŭ lŏn ia ơi Phi-đen Cát-xtơ-rô hăng ơi Ra-un Cát-xtơ-rô Cát-xtơ-rô pơjing rai ăt kah hăng tơlơi rô nao rai ngă hrŏm abih bang Việt Nam - Liên bang Nga.

Siu H’Mai: Pơblang