VOV4.Jarai - Čơtlăm lơ 24/11, ơi Lê Hoài Trung, Ding kơna Ping gah dêh čar ta, Khua Grŭp pơtom hiăp Ping gah dêh čar Việt Nam hăng ơi Tống Đào, Ding kơna Ping gah, Khua Grŭp lăi pơthâo nao rai pơtom hiăp Ping gah dêh čar Khač, gum hrom git gai Jơnum lăng nao rai mơng ataih lăi pơthâo bôh tơhnal Jơnum Ping gah lok 4 tal 13 Ping gah ta hăng Jơnum lok 6 tal 19 Ping gah Cộng sản dêh čar Khač. Amăng mông jơnum, ơi Lê Hoài Trung pơsit Ping găh hăng Kơnuk kơna Việt Nam lăng ba na nao hăng đăo gơnang lĕ, Ping gah hăng mơnuih ƀôn sang dêh čar Khač amra tŭ mă gru grua đưm ư-ang, dưi hmâo dong hơdôm bôh than prong prin phrâo amăng bruă pơdŏng pô lŏn ia djop mơnuih dưm kơnar pha ra mơng Khač. Tal anai, dua bơnah pơsit yôm hơdôm tơlơi pơplih klă amăng tơlơi rô nao rai dua Ping gah, dua dêh čar amăng hơdôm hrơi rơgao; bơkơtuai hơdôm bruă gum hrom pơ̆ anăp anai, amăng anun hmâo bruă pơdŏng dong jơlan guai lŏn ia ƀơi rŏng lŏn mơ-ak klă, giăng mah, pơđĭ kyar; pơtruh gum hrom, wai lăng klă hơdôm tơlơi ƀu djơ̆ hrom ƀơi ia rơsĭ, djru ngă brơi tơlơi giăng mah gum hrom kơplah wah dua Ping gah, dua bôh dêh čar hăng mơnuih ƀôn sang dua bôh dêh čar hmâo hơdôm bôh than prong hloh dong amăng rơwang phrâo./.

Siu H’ Prăk: Pô pơblang