VOV4.Jarai - Ƀơi Hà Nội glăk pơphun Jơnum lok Sa, Khua pơ ala mơnuih ƀon sang dêh čar tal 15. Jơnum tal anai yôm biă mă, ngă atur kơ bruă mă mơng Ƀirô khua pơ ala mơnuih ƀon sang dêh čar tal 15 lơ̆m pơphun ruah, pơsit mơnuih mă bruă amăng Kơnuk kơna hăng pơsit hơdôm bruă bơwih ƀong, mơnuih mơnam, prăk kăk, tuh pơ alin, hơdră bruă dêh čar pơtrun, kiăng hơmâo gru tơhnal kơ bruă pok pơhai ngă tui amăng 5 thun pơ anăp.

Bruă pơphun, ruah mơnuih ngă khua prong amăng Kơnuk kơna lĕ tơlơi yôm phun mơng jơnum blung a amăng rơwang thun Khua pơ ala mơnuih ƀon sang dêh čar tal 15. Tui hăng tơlơi pơkă mơng Phiah phiăn dêh čar thun 2013, tơdơi kơ hơmâo Khua mua pơ ala mơnuih ƀon sang dêh čar ruah, Khua git gai pơ ala mơnuih ƀon sang dêh čar, Khua mir sir, Khua dêh čar, Khua sang phăt kơđi prong amra ngă lơphet ƀuăn ƀơi anăp Khua mua pơ ala mơnuih ƀon sang. Abih bang hơmâo 50 čô khua mơng hơdôm anom bruă Kơnuk kơna hơmâo Ƀirô khua pơ ala mơnuih ƀon sang  ruah mă, pơsit anăn ngă khua ƀơi mông jơnum anai. Kơnong ƀơi Kơnuk kơna, amăng mông jơnum anai, hơmâo ruah 4 čô Kơ-iăng khua dêh čar. Khua grup wai lăng mơnuih pơ ala mơnuih ƀon sang dêh čar yă Nguyễn Thị Thanh brơi thâo, anih hơmâo ruah ngă khua hơmâo lăi pơthâo laih kơ Khul khua apăn bruă Ping gah hăng Ding jum kơđi čar pơsit hluai tui Kơčăo bruă bơdjơ̆ nao anăn bruă ngă khua mơng Ƀirô khua pơ ala mơnuih ƀon sang hăng Kơčăo bruă dưm dăp mơnuih ngă bruă amăng Kơnuk kơna:

“Anom bruă, mơnuih mă bruă amăng Kơnuk kơna amra hơmâo 27 čô khua anun lĕ: Khua dêh čar, 4 čô Kơ-iăng khua dêh čar hăng 18 čô Khua ding jum, 4 čô Khua anom bruă prong kơnar hăng ding jim. Kơčăo bruă hơmâo pơtoưng lăng hlâo laih kiăo tui tơlơi pơtŏng glăi rơwang thun mă bruă mơng Kơnuk kơna thun 2016-2021 hăng kiăo tui tơlơi pơtă hlâo abih bang kơ bruă ruah mơnuih ngă khua”.

 Pơphun jơnum lok 1, Khua pơ ala mơnuih ƀon sang dêh čar tal 15.

Bruă dưm dăp khua mua ngă bruă Kơnuk kơna lĕ bruă ƀu dưi kaih ôh. Tơlơi anai khŏm kiăng ƀing khua gơgrong bruă amăng hrơi jơnum, biă ñu amăng bruă ruah, pơsit 50 čô mơnuih ngă khua amăng Kơnuk kơna. Ơi Phạm Văn Hoà, grup khua mơng Đồng Tháp brơi thâo:

“Tơlơi ƀing khua kiăng ngă lĕ kiăng kơđiăng kơ bruă, ngă bruă khut khăt kiăng pơdah tơlơi đăo gơnang mơng mơnuih ƀon sang ƀơi mông jơnum. Blung a lĕ khŏm ruah hơmâo 50 čô mơnuih ngă khua prong amăng kơnuk kơna. Khua git gai pơ ala mơnuih ƀon sang dêh čar, Kơ-iăng khua, ƀing ding kơna; Khua mir sir, Kơ-iăng khua mir sir; Kơnuk kơna, Kơ-iăng khua dêh čar, mơnuih ngă ding kơna amăng Kơnuk kơna; Anom bruă wai lăng kơđi tơlơi; Sang phăt kơđi, Anom bruă jŭ yap prăk kăk Kơnuk kơna...Kâo lăng anai lĕ bruă yôm biă”.

Hrŏm hăng ruah khua, Ƀirô khua pơ ala mơnuih ƀon sang amra pơsit hơdôm bruă gah bơwih ƀong - mơnuih mơnam, prăk kăk, prăk kơnuk kơna mă yua amăng 6 blan rơgao hăng hơdră pơsir kơ 6 blan rơnuč thun, biă ñu lĕ Jơlan hơdră amăng abih rơwang thun tal 15. Anun lĕ hơdră pơđĭ kyar bơwih ƀong huă - mơnuih mơnam, tuh pơ plai bruă čar, prăk kăk, biă ñu hnưh kơnuk kơna hăng hơdôm tơlơi bơdjơ̆ nao prăk kăk rơwang thun 2021-2025. Anai lĕ hơdôm bruă yôm, ngă atur kơ bruă pơphun ngă “dua mơta bruă” ƀrô pơgang klin ƀrô pơđĭ kyar bơwih ƀong huă mơnuih mơnam, yua Khua mua pơ ala mơnuih ƀon sang dêh čar gơgrong bruă tui tơlơi phiăn. Khua čih pioh hră pơ-ar, Khua wai lăng anom bruă pơ ala mơnuih ƀon sang dêh čar ơi Bùi Văn Cường pơsit:

“Tơdah Khua mua pơ ala mơnuih ƀon sang ƀu pơsit ôh hơdră ngă bruă 5 thun kơ bơwih ƀong mơnuih mơnam amra tơnap kơ Kơnuk kơna amăng bruă pok pơhai git gai črâo bruă rơđah rơđông. Anai lĕ tơlơi pơkă mơng Tơlơi pơtrun Jơnum Ping gah dêh čar tal 13. Khua mua pơ ala mơnuih ƀonsang dêh čar lĕ anom bruă kơnuk kơna prong hloh, khŏm pơsit hơdră pơđĭ kyar bơwih ƀong huă- mơnuih mơnam. Tơdah Khua mua pơ ala mơnuih ƀon sang dêh čar kaih pơsit brơi lĕ bruă tuh pơ plai amra tơnap tap, ngă bruă kaih lĕ pơđĭ kyar kaih mơn”.

Mah glăk bơbeč kơtang yua klin Covid-19 ngă hăng lu tơlơi tơnap phara, ƀu thâo hlâo, samơ̆ amăng akŏ bruă pơđĭ kyar tơlơi bơwih ƀong huă - mơnuih mơnam, Kơnuk kơna ăt gir ngă dua mơta bruă hrŏm hrŏm mơn kiăng tơlơi bơwih ƀong đĭ glăi. Kơnuk kơna ta tŭ ư pơdah thâo kơ khua pơ ala mơnuih ƀon sang aka ƀu pơplih ming tơlơi kơtưn, hnong pơkă pơđĭ kyar bơwih ƀong huă- mơnuih mơnam thun 2021 hơmâo jao lĕ GDP đĭ mơng 6 truh 6,5%. Kơ-iăng khua wai lăng Jơnum min bơwih ƀong huă mơng Ƀirô pơ ala mơnuih ƀon sang ơi Nguyễn Minh Sơn pơblang tui anai:

“Ƀu pơplih hơnong pơkă, mrô kơtưn kiăng ngă ôh. Yua dah ăt kiăo tui hăng Tơlơi pơtrun 124 mơng Khua pơ ala mơnuih ƀon sang mơn kiăng ngă abih bang djŏp bruă, hơdră pơsir mơ̆ Khua mua pơ ala mơnuih ƀon sang dêh čar tal 14 hơmâo jao kơ Kơnuk kơna. Lơ̆m anun, Khua mua pơ ala mơnuih ƀon sang pơtŏng glăi abih bang laih, laih anun thâo hlâo mơn tơlơi bơbeč mơng klin Covid-19 ngă kơ tơlơi bơwih ƀong huă laih anun ăt kiăng gir hloh amăng hrơi blan pơ anăp dưi ngă hơdôm tơlơi hơmâo ba tơbiă”.

Khua git gai pơ ala mơnuih ƀon sang ơi Vương Đình Huệ pơhiăp ƀơi mông jơnum.

Kiăng pơhlôm jơnum lok Sa truh kih, hơdôm anom bruă mơng Ƀirô pơ ala mơnuih ƀon sang dêh čar, Kơnuk kơna, hơdôm anom bruă tơlơi phiăn hơmâo ngă hrŏm hăng hơdôm mơta bruă hơmâo pơdah pơƀuh kơ Khua mua pơ ala mơnuih ƀon sang. Amăng hrơi mông klin Covid-19 kơtang tui anai, Ƀirô khua pơ ala mơnuih ƀon sang hơmâo lăi pơthâo glăi kơ Ding jum kơđi čar laih anun jơnum pơƀut ƀơi sang jơnum Diên Hồng hăng pran jua pơkrem hrơi mông mă bruă hăng dưi ngă klă hloh, rơnuk rơnua hloh. Jơlan hơdră Jơnum tal anai hơmâo ngă aset amăng 5 hrơi đôč pơhmu hăng tơlơi pơmin hlâo kơ anun, ngă bruă wơ̆t măng hrơi pơdơi hlao. Ƀing khua pơ ala mơnuih ƀon sang mơng 19 boh tơring čar, ƀon prong hơmâo klin hơmâo arăng nao čơkă, pơgiăng nao rai hơjăn, dŏ pơ sang jưh tuai hơjăn laih anun jơum hơjăn ƀơi sang jơnum Diên Hồng. Khua čih pioh hră pơ-ar, Khua Sang bruă Pơ ala mơnuih ƀon sang dêh čar ơi Bùi Văn Cường brơi thâo dong:

“Kơ tơlơi phiăn, mơnuih mơng hơdôm tơring čar glăk pơčlah mơnuih mơnam tui Tơlơi pơčrâo trun 16 lơ̆m nao pơ Hà Nội, tơdah mơnuih ƀon sang lĕ khŏm pơčlah hơjăn, samơ̆ Khua dêh čar hơmâo pơsit hăng ƀing khua mơ̆ hơmâo pơčrang kman 3 wơ̆t huăi ƀuh kman, hơmâo tlâ̆o vaccine lĕ dưi glăi jơnum mơn. Khă hnun khŏm kiăo tui tơlơi pơtrun pơgang klin Covid-19. Ră anai, ƀing gơmơi hơmâo hơdră pơhlôm hlâo, tơdah ƀuh pô khua ƀơi thơ pơtuk hơdrap lĕ hơmâo anih jơnum hơjăn mơn, samơ̆ ăt pơhmư̆ tơlơi jơnum laih anun plĕ hră tui ƀing khua pơkŏn mơn”.

Mơnuih ƀon sang amăng dêh čar glăk krăp lăng hăng đăo gơnang, Jơnum lok 1, Khua pơ ala mơnuih ƀon sang dêh čar tal 15 rơnuk rơnua, truh kih. Anai lĕ mông jơnum yôm biă mă, tơdah ngă klă lĕ amra pơtrut pơđĭ kyar tơlơi bơwih ƀong huă-mơnuih mơnam, biă ñu lĕ ngă “dua mơta bruă” ƀrô pơđĭ kyar bơwih ƀong huă ƀrô pơgang klin Covid-19./.

Siu H'Mai: Pơblang