VOV4.Jarai - Hrơi anai lơ 20/7, Jơnum lok 1, Khua pơ ala mơnuih ƀon sang dêh čar tal 15, ƀơi Sang jơnum prong. Amăng rơbêh 11 hrơi ngă bruă, Khua mua pioh 3 hrơi prăp lui mơnuih đĭ ngă khua lơ̆m pơphun ruah, pơsit mơnuih ngă khua mua amăng anom bruă Kơnuk kơna, amăng anun hơmâo Khua mir sir, Khua dêh čar hăng Khua git gai pơ ala mơnuih ƀon sang; sem lăng, bơkơtuai kơ hơdôm tơlơi lăi pơthâo glăi gah bơwih ƀong - mơnuih mơnam hăng pơsit sa, dua bruă yôm pơkŏn dong.

Tui hăng hơdră ngă bruă, yang hrơi mơguah tơdơi kơ Khua git gai pơ ala mơnuih ƀon sang dêh čar tal 15 ơi Vương Đình Huệ pơhiăp pơphun jơnum, Khua git gai Ping gah ơi Nguyễn Phú Trọng amra hơmâo tơlơi pơhiăp yôm. Tơdơi kơ anun, Khua mua pơ ala mơnuih ƀon sang dêh čar jơnum hơjăn pơčrông sai ruah mơnuih ngă khua, tŭ ư kiăo tui Tơlơi pơtrun mrô Kơ-iăng khua git gai pơ ala mơnuih ƀon sang dêh čar, mrô khua apăn bruă pơ ala mơnuih ƀon sang dêh čar tal phrâo. Či tlam, ƀing khua plĕ hră hơgŏm ruah Khua git gai pơ ala mơnuih ƀon sang dêh čar. Tui tơlơi phiăn, Khua git gai pơ ala mơnuih ƀon sang phrâo ƀuăn ngă bruă abih pran hăng Lŏn ia, hăng mơnuih ƀon sang, hăng Phiah phiăn dêh čar. Tơdơi kơ anun, Khua mua pơ ala mơnuih ƀon sang dêh čar pơphun ruah 4 čô Kơ-iăng khua pơ ala mơnuih ƀon sang dêh čar hăng 12 čô ding kơna apăn bruă pơ ala mơnuih ƀon sang dêh čar.

Siu H’Mai: Pơblang