VOV4.Jarai-Mơguah lơ 27/12, ƀơi Hà Nội, Jơnum min djop djuai ania mơnuih mơnam Việt Nam jơnum mơ̆ng ataih lăng nao rai amăng tivi lok 11 Grup khua mua Jơnum min djop djuai ania mơnuih mơnam Việt Nam tal 9. Pơhiăp ƀơi mông jơnum, Khua Jơnum min djop djuai ania mơnuih mơnam Việt Nam, ơi Đỗ Văn Chiến lăi, bruă mă mơ̆ng Jơnum min djop djuai ania mơnuih mơnam Việt Nam thun 2021 hơmâo lu tơlơi gêh găl samơ̆ hơmâo bong glăi lu tơlơi tơnap tap, lông lăng, biă mă ñu bơbeč djơ̆ mơ̆ng lu tơlơi yua klin Covid 19 ngă.

Boh tơhnal mơ̆, djop gưl anom bruă wai lăng djop djuai ania mơnuih mơnam dưi ngă lĕ lăp pơpŭ biă mă. Kơ bruă mă thun 2022, Khua Jơnum min djop djuai ania mơnuih mơnam Việt Nam, ơi Đỗ Văn Chiến lăi, Khua mua git gai hơmâo pơkra hơdră tum teč, pơtum nao amăng 3 mơta bruă phun.

Sa lĕ, pơđĭ tui boh tŭ yua, krăo lăng amăng bruă drơ̆ng glăi mơ̆ng mơnuih mơnam. Dua lĕ, ngă lu bruă kiăng pơđing hmư̆, čih pioh pơtum glăi tơlơi rơkâo mơ̆ng mơnuih ƀôn sang hăng mơnuih ruah khua kiăng hmao lăi pơthâo hăng Ping gah laih anun Kơnuk kơna. Klâo lĕ, kơtưn bruă jơnum pơgôp hrom pơpha bruă mă kiăng pơđĭ kơtang mă bruă amăng Anom bruă djop djuai ania mơnuih mơnam dêh čar mơ̆ng gơnong dlông truh pơ să, plơi pla.

Nay Jek: Pơblang