VOV4.Jarai-Mơguah lơ 20/10, jơnum lok 2 khua mua pơ ala mơnuih ƀôn sang dêh čar ta pơphun sit nik. Jơnum lok anai tui hơdră lăng nao rai amăng tivi laih anun jơnum pơtum abih bang ƀơi sang jơnum prong khua pơ ala mơnuih ƀôn sang dêh čar laih anun pơpha jing dua wơ̆t: tal 1 jơnum mơ̆ng ataih lăng nao rai amăng tivi mơ̆ng lơ 20-30/10, tal 2 jơnum pơtum mơ̆ng lơ 8-13/11. Tui anun, khua mua pơ ala mơnuih ƀôn sang dêh čar amra mă bruă amăng 17 hrơi, amăng anun, ăt prăp lui jơnum mơ̆ng ataih abih dua tal tơdah klin covid 19 tơnap tap.

Tui hăng hơdră, Kơnuk kơna prăp lui 50 mơta hră lăi pơthâo, pơdah đĭ, kơčăo bruă, jơlan hơdră pioh kơ khua mua pơ ala mơnuih ƀôn sang dêh čar pơhmư̆.

Ƀơi mông jơnum anai, ƀing pơ ala mơnuih ƀôn sang amra sem lăng lu hră lăi pơthâo hlâo yôm, kah hăng pơtong glăi bruă ngă tui akŏ bruă pơđĭ kyar bơwih ƀong huă mơnuih mơnam hăng jŭ yap prăk kăk kơnuk kơna thun 2021, bruă pơhlôm, pơgang klin covid 19; pơsit akŏ bruă pơđĭ kyar bơwih ƀong huă mơnuih mơnam thun 2022, jŭ yap lăng rơnoh prăk kơnuk kơna hăng hơdră pơpha yua prăk kơnuk kơna thun 2022, amăng anun kơdun glăi hrơi ngă tui hơdră pơđĭ prăk blan.

Hơdôm hră lăi pơthâo bruă mă mơ̆ng Khua sang phat kơđi dêh čar, Khua anom bruă ĕp kơđi dêh čar; hră lăi pơthâo bruă pơhlôm, pơgăn tơlơi hưp ham ƀong kông ngăn, bruă pơhlôm, pơgăn tơlơi soh sat hăng ngă soh tơlơi phiăn kơnuk kơna, bruă ngă tui kơđi laih phat giong amăng thun 2021; pơtum glăi tơlơi pơgôp hiăp mơ̆ng khul krăo lăng hăng boh tơhnal krăo lăng pơsir kơđi tơlơi ăt pơdah đĭ kơ khua mua pơ ala mơnuih ƀôn sang dêh čar pơmhư̆ tal anai.

Biă mă ñu, khua mua pơ ala mơnuih ƀôn sang sem lăng, pơsit brơi anŏ pơkă lăng lŏn tơnah dêh čar pioh mă yua mơ̆ng thun 2021-2030, lăng nao pơ anăp adih truh thun 2045 hăng akŏ bruă mă yua lŏn tơnah dêh čar mơ̆ng thun 2021-2025; akŏ bruă dăp glăi atur tơlơi bơwih ƀong huă mơ̆ng thun 2021-2025.

Ƀing khua mua pơ ala mơnuih ƀôn sang dêh čar amra ngă bruă wơ̆t hrơi năm, hrơi tơjuh ƀu pơdơi ôh, kiăng pơkrem hrơi mông, amra mă bruă amăng mông pơdơi či tlam mơmŏt đah mơ̆ng pơtrun ƀiă hrơi jơnum. Anai ăt jing tơlơi kiăng mơ̆ng mơnuih ƀôn sang ruah khua amăng dêh čar ta lơ̆m hrơi blan ngă tui tơhnal pơtrun pơgang klin rah, pơtrut tơlơi bơwih ƀong huă mơnuih mơnam dêh čar rah.

Nay Jek: Pơblang