VOV4.Jarai - Tom brơi lơ 19/8, Khul pơ ala mơnuih ƀon sang tơring čar Dak Nông tal IV, rơwang thun 2021-2026 pơphun jơnum lok 2. Tui tơlơi pơhing amăng jơnum, 6 blan akŏ thun 2021, đơ đam tơring čar hơmâo 7 grup hơnong pơkă pơđĭ kyar bơwih ƀong huă, mơnuih mơnam klă hloh. Rơnoh pơđĭ kyar hrŏm amăng tơring čar dưm dưm 6,03%. Abih tih rơnoh pơhrui ngăn drăp kơnuk kơna dưm dưm 1.582 klai prăk đĭ 29% pơhmu tui tơđar thun 2020 hăng truh 58% rơnoh arăng jao.

Samơ̆ yua klin Covid-19 ngă tơnap tap hơmâo bơbeč sat nao bruă pơđĭ kyar bơwih ƀong huă mơnuih mơnam amăng tơring čar. Amăng tal jơnum anai, ƀing khua mua pơ ala mơnuih ƀon sang amra sem lăng, pơsit lu boh tơhnal yôm phun . Khua khul pơ ala mơnuih ƀon sang tơring čar Dak Nông brơi thâo, jơnum tal anai hơmâo lu bruă mă. Yua anun djop gưl, djop gơnong bruă kiăng đing nao hloh, gir run ƀiă dong, hăng pran jua khut khăt amăng bruă mă, mă bruă thâo pơčeh phrâo,  tŭ yua, lăp djơ̆ hăng hrơi blan hơmâo klin glăk tơnap tap, kiăng kơ pơgiong akŏ bruă pơđĭ kyar bơwih ƀong huă - mơnuih mơnam amăng tơring čar.

Siu Đoan: Pơblang