VOV4.Jarai - Mơguah lơ 13/7, pơgôp hiăp kơ akŏ bruă pơđĭ kyar bơwih ƀong huă - mơnuih mơnam, bruă ngă yua ngăn drăp Kơnuk kơna, akŏ bruă brơi čan, tla hnưh hăng akŏ bruă tuh pơ alin bruă ring bruă ngă thun blan gap ƀrô, rơwang thun 2021-2025, Jơnum min apăn bruă Khua pơ ala mơnuih ƀon sang dêh čar tŭ ư hăng hơdôm hơdră bruă mơng Kơnuk kơna kơ rơnoh prăk mă yua lu hloh mơng ngăn drăp kơnuk kơna rơwang thun anai him lăng lu ƀiă rơwang thun hlâo anun lĕ 3,7% GDP. Jơnum min apăn bruă Khua pơ ala mơnuih ƀon sang dêh čar brơi thâo: Ră anai rơnoh pơđĭ kyar aka ƀu kơtang, aka ƀu pơhlôm hơđong. Anŏ bơbeč mơng ayuh hyiăng ƀu klă ngă, hơjan kơthel, ia mơsin ram hyu ngă sat kơ bruă bơwih ƀong. Sit biă ñu, klin Covid-19, tui hăng mrô jŭ yap aka ƀu lăi nao tong ten hơdôm tơlơi tơnap tap mơng anom bơwih ƀong sĭ mơdrô hăng mơnuih ƀon sang.

Kơ-iăng Khua pơ ala mơnuih ƀon sang dêh čar Trần Thanh Mẫn rơkâo kiăng lăng glăi dơlăm dong hơdôm anŏ aka ƀu klă amăng bruă pơhrui, mă yua prăk kak laih rơgao, biă mă ñu lĕ bơbeč mơng klin Covid-19. Sit biă ñu lĕ đom hnưh hăng rơnoh pơhrui ngăn drăp kơnuk kơna. Ăt amăng mơguah lơ 13/7, Jơnum min apăn bruă Khua pơ ala mơnuih ƀon sang dêh čar pơgôp hiăp amăng hră lăi pơthâo hơmâo pơƀut glăi mơng tơlơi pơgôp mơng mơnuih ƀon sang amăng đơ đam dêh čar amăng jơnum blung a, Khua pơ ala mơnuih ƀon sang dêh čar tal 15.

Siu Đoan: Pơblang