VOV4.Jarai - Tô̆ tui jơlan hơdră jơnum lok 58, mơguah anai (14/7), Jơnum min apăn bruă Khua pơ ala mơnuih ƀôn sang dêh čar ta gum pơhiăp prăp lui tal jơnum lok sa, Khua pơ ala mơnuih ƀôn sang dêh čar tal 15. Tui hăng bôh yôm jơlan hơdră jơnum lok 57 mơng Jơnum min apăn bruă Khua pơ ala mơnuih ƀôn sang dêh čar ta, pơkă hlâo abih bang mông mă bruă mơng tal jơnum lok sa, Khua pơ ala mơnuih ƀôn sang dêh čar ta tal 15 lĕ 11 hrơi ha mơkrah. Amăng anun, mông pioh lu hloh kơ bruă mơnuih mă bruă. Amăng tal jơnum lok sa, Khua pơ ala amra pơphun ruah Khua mir sir, Khua dêh čar, Khua git gai wai lăng pơ ala mơnuih ƀôn sang dêh čar tal phrâo. Hơdôm mông jơnum pok phun, pơđut; bơkơtuai kơ tơlơi bơwih ƀong – mơnuih mơnam, ngăn drăp Kơnuk kơna 6 blan akô̆ thun, kơčăo bruă pơđĭ kyar bơwih ƀong – mơnuih mơnam 5 thun, bruă ngă tui tơlơi pơkrem, pơgăn prai prăk khưi khai thun 2020 amra dưi pôr jua pơhiăp, pơdah rŭp tui tlôn kiăng mơnuih ƀôn sang hmư̆ lăng tui. Hăng anô̆ pha ra kơ bôh yôm tal jơnum, Khua pơ ala mơnuih ƀôn sang khom jơnum hơbit ƀơi Sang mă bruă Khua pơ ala mơnuih ƀôn sang. Anom bruă Khua pơ ala hmâo gơgrong hlâo gum hrom hăng hơdôm ƀirô bơdjơ̆ nao prăp lui tŏng ten kiăng pơhlôm klă hloh kơ tal jơnum./.

Siu H’ Prăk: Pô pơblang