VOV4.Jarai - Tlam lơ 13/7, pơgôp hiăp kơ hơdră tuh pơ alin tui Jơlan hơdră hơnong pơkă dêh čar amăng man pơdong plơi pla phrâo rơwang thun 2021-2025, Jơnum min apăn bruă Khua pơ ala mơnuih ƀon sang dêh čar tŭ ư kah mă 30 rơbâo klai prăk, anai lĕ rơnoh prăk tuh pơ alin thun blan gap ƀrô kiăng kơ pok pơhai jơlan hơdră. Anŏ pơplih phrâo mơng Jơlan hơdră rơwang thun 2021-2025, anun lĕ: Pơjing črăn hơnong pơkă dêh čar amăng man pơdong plơi pla phrâo djop gưl (tơring čar, tơring glông, să) tui hơdôm mrô pơkă (lăp djơ̆, hrưn đĭ hăng tui gru phrâo). Jơlan hơdră gir run hơmâo ƀiă biă mă ñu 80% mrô să amăng đơ đam dêh čar dưi ngă pơgiong hơnong pơkă plơi pla phrâo, amăng anun, hơmâo giăm 40% mrô să dưi ngă hơnong pơkă pơplih phrâo, 10% dưi ngă tui hơnong pơkă gru phrâo; gir run truh thun 2025 đơ đam dêh čar ƀuh să pơpă dong tah ngă pơgŭ 15 hơnong pơkă; pơsur djop plơi pla hơmâo anŏ gal gơgrong man pơdong plơi pla phrâo tui gru phrâo. Khua git gai pơ ala mơnuih ƀon sang dêh čar ta ơi Vương Đình Huệ rơkâo kah pha bơkơnar rơnoh prăk, đing nao jơlan hơdră dêh čar man pơdong plơi pla phrâo rơwang thun 2021-2025, wŏt rơnoh prăk tuh pơ alin, rơnoh prăk bruă mă; ngăn drăp kơnuk kơna, gơnong glông hăng ƀon lan, đing nao lu dong jơlan hơdră anai.

Siu Đoan: Pơblang