VOV4.Jarai - “Kiăng pơplih phrâo dong Jơnum lok 1 mơng Ƀirô khua pơ ala mơnuih ƀon sang dêh čar tal 15 tui hơdră pơhrŏ ƀiă mông pơđok hră lăi pơthâo glăi, pơđĭ tui mông lăi pơthâo bruă hyu hơduah tơña lăp djơ̆, kiăng ƀing khua hơmâo mông sem lăng rơđah hăng pơgôp hiăp”. Anai lĕ tơlơi lăi pơthâo mơng Khua git gai pơ ala mơnuih ƀon sang Vương Đình Huệ ƀơi mông jơnum prăp lui Jơnum lok 1, Khua pơ ala mơnuih ƀon sang dêh čar tal 15 yua Jơnum min apăn bruă pơ ala mơnuih ƀon sang dêh čar pơphun jơnum amăng tlam lơ 14/6, ƀơi Hà Nội. Tui tơlơi him lăng, Jơnum lok 1, Khua pơ ala mơnuih ƀon sang dêh čar tal 15 hơmâo hrơi jơnum lĕ 11,5 hrơi ngă bruă. Amăng anun,  Khua mua pioh 5 hrơi dăp mơnuih ngă bruă, pioh 4,5 hrơi či lăng glăi hră pơ-ar lăi pơthâo bruă mă hăng sa, dua tơlơi pơkŏn dong, laih dong 0,5 hrơi pioh kơ bruă jơnum lăng hlâo; pơphun hăng pơđut amăng 1 hrơi, hrơi pơđom lui lĕ 0,5 hrơi. Ƀơi mông jơnum, ƀing khua amăng Jơnum  min apăn bruă pơ ala mơnuih ƀon sang dêh čar tŭ ư hrơi pơphun jơnum lok 1, Khua pơ ala mơnuih ƀon sang dêh čar tal 15 lĕ amăng lơ 20/7. Yua anai lĕ mông jơnum tal blung a, hăng bruă ngă lu hloh lĕ dưm dăp mơnuih ngă bruă, khŏm jơnum ƀuh ƀơi anăp. Amăng anun, hơmâo năng ai 500 čô khua. Yua hnun, ƀing ding kơna lăi: Kiăng prăp lui bruă pơgang klin Covid-19 klă ƀiă. Ăt amăng tlam lơ 14/6 mơn, ding kơna Jơnum min apăn bruă pơ ala mơnuih ƀon sang dêh čar ăt pơgôp hiăp kơ Jơlan hơdră wai lăng mơng Ƀirô khua pơ ala mơnuih ƀon sang dêh čar, Jơnum min khua pơ ala mơnuih ƀon sang dêh čar thun 2022.

Siu H’Mai: Pơblang