VOV4.Jarai - Mơmot tom brơi (6/8), gah yŭ tơlơi git gai mơng Khua git gai wai lăng pơ ala mơnuih ƀôn sang dêh čar ta ơi Vương Đình Huệ, Jơnum min apăn bruă khua pơ ala mơnuih ƀôn sang dêh čar ta jơnum ječ kiăng gum pơhiăp kơ hră čih Tơlơi pơtrun pơsit mơng Kơnuk kơna kơ ngă tui hơdôm bruă kiăng ječ pơgang, pơgăn klin Covid-19 tui Tơlơi pơtrun pơsit mrô 30 mơng Khua pơ ala mơnuih ƀôn sang dêh čar mă yua amăng Tal jơnum lok sa, Khua pơ ala mơnuih ƀôn sang dêh čar tal 15.

Rơđah biă ñu, brơi hơdôm Ding jum ia jrao, Pơgang lŏn ia, Kông ang, Jơnum min mơnuih ƀôn sang hơdôm bôh tơring čar pơsit pơdong anih anom tŭ mă, pơjrao mơnuih ƀă Covid-19 hrom hăng anun lĕ hră pơsit mă bruă hăng rơkâo pơhrua nao dong bôh tŭ yua mơng bôh yôm anai, truh abih thun 2022 hăng kơnong kơ mă yua amăng tơlơi kiăng ječ pơgang, pơgăn klin Covid-19 tui hơdră bŏng glăi klin hăng tơlơi kiăng ngă tui ƀơi rim anih anom plơi pla. Pơhiăp amăng mông jơnum, Khua git gai wai lăng pơ ala mơnuih ƀôn sang dêh čar ta ơi Vương Đình Huệ lăi lĕ, bruă mă yua tơlơi pơtrun pơsit anai kiăng biă, ječ biă amăng hơdôm hrơi klin ruă ngă jai hrơi jai kơtang, tơnap him lăng, lar hyu lu tơring čar, ƀôn prong, biă ñu lĕ hơdôm bôh tơring čar gah Dơnung dêh čar./.

Siu H’ Prăk: Pô pơblang