VOV4.Jarai - Grup hyu mă bruă mơng Jơnum min djop djuai ania mơnuih mơnam Việt Nam tơring čar Lâm Đồng, hơmâo nao čuă hăng pơpŭ kơ hrơi ngă yang Phật Đản Phật lịch 2565 thun 2021 ƀơi sang phơ̆t Tổ Đình Linh Quang hăng Sang phơ̆t Linh Sơn plơi prong Đà Lạt. Ƀơi hơdôm anih nao čuă, Khua Jơnum min djop djuai ania mơnuih mơnam Việt Nam tơring čar hơmâo pơpŭ tơlơi hiam klă hloh kơ ƀing ơi phơ̆t yă dơng hăng abih bang mơnuih tui đăo phơ̆t amăng bơyan ngă yang Phật Đản mơ-ak mơai, bă blai bưng hiam; laih dong tŭ yap hăng lăng yôm hơdôm tơlơi gum pơgôp mơng ƀing ơi phơ̆t yă dơng hăng abih bang mơnuih tui đăo phơ̆t amăng bruă ngă tui tơlơi črâo trun mơng Ping gah, hơdră bruă, tơlơi phiăn mơng Kơnuk kơna, biă mă ñu lĕ bruă pơtô pơblang amăng pơgang klin Covid-19 amăng tơring čar. Pô pơ ala brơi Khul đăo phơ̆t tơring čar hăng plơi prong Đà Lạt pơpŭ bơni tơlơi đing nao, gum djru mơng Jơnum min djop djuai ania mơnuih mơnam Việt Nam tơring čar lăi phara hăng djop anom bruă amăng tơring čar hnun mơn hơmâo ngă gêh gal kiăng kơ Khul đăo phơ̆t jai hrơi đĭ kyar dong.

Siu Đoan: Pơblang