VOV4.Jarai - Amăng blan 9/2021, Khua ding jum, khua jơnum min djuai ania hơmâo 2 tơlơi pơsit  mă yua 1 klai 358 klăk prăk djru brơi mơnuih djuai ania ƀiă rin rơpa hăng ƀing čơđai sang hră hrăm Dự bị pơ sang hră gưl ƀôn prong Hồ Chí Minh ƀă klin Covid-19. Ră anai, anom bruă pơ ala Jơnum min djuai ania ƀơi ƀôn prong Hồ Chí Minh glăk gir run pơtô brơi djop ƀon lan amăng kual Ngŏ Dơnung pơphun djru brơi ƀing mơnuih tơnap tap, lăp djơ̆ kiăng hmao tlôn pơ alum pran jua amăng hơdôm hrơi tơnap yua klin ngă. Truh abih blan 9, djop tơring čar kual Ngŏ Dơnung hơmâo laih 10.864 čô mơnuih djuai ania ƀiă ƀă klin Covid-19. Anom bruă djuai ania amăng hơdôm tơring čar amăng kual hơmâo gir hyu pơ alum pran jua, djru brơi mơnuih djuai ania ƀiă amăng hơdôm kual hơmâo klin, pơgôp pơhlôm hơđong tơlơi hơdip. Kơnong ƀơi Đồng Nai, Anom bruă djuai ania tơring čar git gai, jak iâu pơgôp 3 tơ̆n braih kiăng kơ djru brơi mơnuih djuai ania ƀiă amăng hơdôm kual guang dar.

Siu Đoan: Pơblang