VOV4.Jarai-Ăt amăng tal jơnum lok 57, mơguah lơ 15/6, ƀơi sang bruă khua pơ ala mơnuih ƀôn sang dêh čar, Jơnum min git gai pơ ala mơnuih ƀôn sang dêh čar pơgôp hiăp hră lăi pơthâo pơtong glăi boh tơhnal ngă tui akŏ bruă pơđĭ kyar bơwih ƀong huă mơnuih mơnam hăng yua prăk kơnuk kơna 6 blan akŏ thun 2021 hăng akŏ bruă ngă tui hơdôm thun pơ anăp, 6 blan rơnuč thun anai dơ̆ng.

Khua git gai pơ ala mơnuih ƀôn sang dêh čar ơi Vương Đình Huệ git gai jơnum. Ƀơi mông jơnum, ƀing ding kơna Jơnum min lăi lĕ: Kơnuk kơna kiăng pơhlôm hơđong bơwih ƀong huă mơnuih mơnam dêh čar, khom bong kjăp ƀu lui prăk trun nua hăng kơmlai čan khom ƀiă, rơnoh prăk bơblih hơđong, tuh pơ alin kơ bruă čar khom djơ̆ hơdră, anih hơdip jum dar kơ bruă tuh pơ alin sĭ mơdrô dưi ĕp lăng tong ten hăng bơblih klă, ngă tui anun kah lơ̆m klin abih laih tơlơi bơwih ƀong huă dêh čar ta mơ̆ng tañ rŭ glăi hăng pơđĭ kyar.

Tui hăng hră lăi pơthâo, 6 blan akŏ thun 2021, hnong pơđĭ kyar GDP him lăng 5,8%. Prăk pơhrui glăi kơ dêh čar rơbêh 55,5%, đĭ tui rơbêh 10% pơkă hăng thun 2020. Lơ̆m klin kheng covid 19 ăt dŏ, hơdôm mrô rơnoh anun brơi ƀuh, dưi ngă djơ̆ tơhnal pơtrun laih. Lăp gleng nao hơmâo 23% mrô anom bruă sĭ mơdrô tơbiă anăn mơ̆ng anih sĭ mơdrô, tơlơi gơgrong mơ̆ng lu anom bruă trun hĭ yua klin kheng ngă.

Nay Jek: Pơblang