VOV4.Jarai - Ƀơi mông jơnum lok 6 tal 1 rơnuč rơwang hrơi tơjuh rơgao, Jơnum min khua apăn bruă git gai pơ ala mơnuih ƀon sang dêh čar hơmâo pơgôp hiăp kơ bruă brơi ngă sa, dua tơlơi pơkôl pơkă, hơdră ngă bruă gah ia jrao bơwih brơi kơ bruă pơhlôm, pơgang klin Covid-19. Mơng 4 mơta tơlơi prong kơ hơdră bruă pơhlôm pơgang klin Covid-19 yua Ding jum ia jrao ba tơbiă, Jơnum min khua apăn bruă git gai pơ ala mơnuih ƀon sang kiăng pơtŏng glăi djŏp bruă bơdjơ̆ nao, pơhlôm dưi ngă, biă ñu lĕ bruă brơi ƀing gum pơgang klin hăng prăk kăk kơnuk kơna ƀudah Keh prăk pơhlôm nua ia jrao tla brơi prăk khăm, pơjrao tơlơi ruă.

Khua ding jum ia jrao Nguyễn Thanh Long kiăng, Jơnum min apăn bruă git gai pơ ala mơnuih ƀon sang dêh čar brơi Ding jum ia jrao, hơdôm Ding jum, anom bruă hăng hơdôm boh tơring čar dưi ba nao mơnuih mă bruă, iâu mơnuih mă bruă pơgang klin Covid-19 mơ̆ ƀu kiăng kiăo tui tơlơi pơkă bruă dưi ngă amăng hră pơsit brơi mă bruă, ƀudah hơmâo tŭ ƀu hơmâo tŭ mơn hră brơi mă bruă. Rơkâo kiăng brơi khăm pơjrao tơlơi ruă mơng ataih kơ mơnuih ƀă klin Covid-19 ƀudah mơnuih ƀu dưi nao pơ sang ia jrao khăm pơjrao tơlơi ruă yua hơmâo klin Covid-19. Laih dong, rơkâo kơ Ding jum ia jrao sem lăng, pơsit brơi yua ia jrao hơmâo laih hră pơsit dưi blơi mơng čar rơngiao pioh pơkra jrao pơgang, jrao pơjrao klin Covid-19.

Jơnum min khua apăn bruă git gai pơ ala mơnuih ƀon sang dêh čar kiăng, hơdôm hơdră ngă bruă phrâo khŏm lăng glăi, pơtŏng glăi djŏp, pơhlôm dưi ngă, biă ñu bruă brơi ƀing gum djru nao pơgang klin lơ̆m klin kheng amuñ ba truh tơlơi djai brŭ, tơlơi suaih pral ană mơnuih. Kơ-iăng khua git gai pơ ala mơnuih ƀon sang dêh čar Trần Quang Phương rơkâo:

“Pơhŭi kơtang, hiư̆m pă pơhŭi kơtang? tui ƀơi huăi kơtang? kiăng jŭ yap rơđah. Tal dua, mơnuih djru tlâ̆o pơgang, pơčrang kman, wai lăng pơjrao mơnuih ruă. Phara hăng hră pơsit brơi mă bruă ƀing ta thâo rơđah laih, samơ̆ kiăng pơkă mơn đah mơng thâo wai lăng kơjăp ƀing anai. Đah mơng huăi hơmâo pô pơhmao mă, kah hăng aka ƀu kơtang đơi lơi, aka ƀu pơhŭi sat kơ tơlơi hơdip lơi ăt pơphun ngă mơn”.

Ding jum ia jrao ăt rơkâo kiăng tla prăk tui tơlơi pơtrun mrô 268 mơng Jơnum min apăn bruă git gai pơ ala mơnuih ƀon sang dêh čar mơn, samơ̆ brơi pơhrua tui tơlơi pơkă tơdah ƀu dưi kah phara ôh prăk pioh yua lĕ mă prăk kơnuk kơna tla brơi abih; laih dong brơi Kơnuk kơna pơsit brơi mă yua prăk mơng prăk pơđom lui mơng Keh prăk pơhlôm nua ia jrao đah mơng djru hrŏm Kơnuk kơna tla prăk khăm pơjrao kơ mơnuih ƀă klin Covid-19. Lăi pơthâo rơđah kơ prăk apah, prăk blan hăng mơnuih ngă bruă pơgang klin, Kơ-iăng khua ding jum prăk kăk Võ Thành Hưng brơi thâo dong:

“Amăng tơlơi pơkă mơng Kơnuk kơna ră anai, abih bang ƀing gum pơgang klin lêng kơ hơmâo prăk djru. Kơnong gah bruă ia jrao lĕ bơdjơ̆ nao prăk apah mơng anom bruă gơñu. Pơhmutu, anom bruă glăk hơmâo 100% mrô prăk mă yua lĕ hơdôm anom bruă anai pơhlôm prăk blan kơ mơnuih mă bruă. Samơ̆, lơ̆m gum pơgang klin lĕ prăk kơnuk kơna apah brơi kơ ƀing anai. Tŭ ư pơhrua tui dong gơnam yua gah ia jrao amăng tơlơi pơtrun hơđong nua gơnam”.

Tŭ ư hăng Ding jum ia jrao kơ bruă tla prăk tui tơlơi pơtrun mrô 268 samơ̆ hơmâo mrô Kơnuk kơna pơsit kiăng Keh prăk pơhlôm nua ia jrao tla. Kơ-iăng khua Anom bruă prăk pơhlôm nua ia jrao Phạm Lương Sơn lăi:

“Abih bang prăk yua gah ia jrao gah rơngiao kơ prăk tla mơng Keh prăk pơhlôm nua ia jrao lĕ ha mơta. Mơta dua dong, hơdôm djuai jrao kơnong pioh pơjrao Covid. Mơta 3, abih bang prăk tla sưng đih. Yua dah ƀing ruă mơng hrơi mut nao pơjrao truh hrơi suaih lĕ pô ƀă klin Covid-19 khŏm dŏ pơjrao amăng sang ia jrao kiăo tui hră črâo ba mơng ƀing ơi ia jrao, prăk sưng đih lĕ pơjrao amăng sang ia jrao mơn. Bơ bruă pơčrang kman, mă drah, suă pran hăng măi, ép mô...Ta kah phara lĕ rơngiă lu mông. Ƀing gơmơi tŭ ư brơi tla tui Tơlơi pơtrun 268”.

Ƀơi mông jơnum, Khua git gai pơ ala mơnuih ƀon sang dêh čar ơi Vương Đình Huệ kiăng thâo rơđah anŏ phara mơng prăk kơnuk kơna hăng Keh prăk pơhlôm nua ia jrao tla brơi bruă khăm pơjrao tơlơi ruă:

“Prăk pơhlôm nua lĕ ta nô̆p ta mă yua glăi pô ta, bơ prăk kơnuk kơna lĕ tơlơi pơsit mơng kơnuk kơna. Yua hnun amăng Tơlơi pơtrun anai gơmơi pơsit ƀu jao kơ Kơnuk kơna ôh bruă git gai pơtruh nao rai Prăk kơnuk kơna hăng Keh prăk pơhlôm nua. Tơlơi pơtrun anai hơmâo pơkă rơđah laih anŏ hơget ta mă prăk kơnuk kơna, anŏ hơget ta tla hăng prăk pơhlôm nua ia jrao. Bruă hiư̆m ta ƀu dưi pơklah hĭ ôh lĕ ta tla hăng prăk kơnuk kơna kiăng rơđah rơđông”.

Jơnum min khua git gai pơ ala mơnuih ƀon sang dêh čar rơkâo Ding jum ia jrao ngă giong hĭ hră pơ-ar či lăi pơthâo glăi kơ Ding jum kơđi čar pơgôp hiăp. Laih dong, lăng glăi kiăng tơlơi pơtrun čih pơkra ber đôč, amun thâo hluh, biă ñu lĕ hơdôm bruă gah ia jrao, đah mơng tañ ngă tui tơlơi pơtrun, tơlơi djru gah ia jrao bơwih brơi bruă pơhlôm pơgang klin Covid-19 ră anai.

Lại Thị Hoa: Čih - Siu H’Mai: Pơblang