VOV4.Jarai - Rơwang hrơi tơjuh rơgao, ƀơi Sang bruă pơ ala mơnuih ƀon sang dêh čar, yŭ tơlơi git gai mơng Ding kơna Ding jum kơđi čar, Khua git gai pơ ala mơnuih ƀon sang dêh čar ơi Vương Đình Huệ, Jơnum min khua apăn bruă pơ ala mơnuih ƀon sang dêh čar pơphun jơnum lok 56. Sa amăng hơdôm tơlơi hơmâo ba bơkơtuai, pơgô̆p hiăp lĕ Hră lăi pơthâo mơng Kơnuk kơna kơ bruă pơkrem prăk kăk, pơgăn bruă prai prăk kăk.

Lăi pơthâo glăi tơlơi hơduah ĕp bruă ngă tui tơlơi pơtrun pơkrem prăk, pơgăn prai prăk kơnuk kơna thun 2020 brơi ƀuh: Amăng hrơi blan prăk pơhrui glăi aset yua bơbeč mơng tơlơi truh lŏn adai ngă, klin kheng, prăk brơi kơ djŏp gưl tơnap mơn, Ding jum prăk kăk lăi pơhmư̆ pơgôp hiăp kơ Kơnuk kơna, Khua dêh čar git gai hơdôm ding jum, anom bruă, tơring čar pơtrut hơdră mă yua prăk thâo pơkrem, ƀu dưi prai prăk ôh, pơkrem 10% mrô prăk mă yua re se; pơhrŏ trun prăk pioh jơnum, prăk hyu mă bruă, pơkrem prăk mă yua amăng bruă aka ƀu kiăng đơi. Sang prăk kơnuk kơna hơmâo pơkrem năng ai 55 rơbâo klai prăk, dưm dưm 5% mrô prăk Sang bruă pơ ala mơnuih ƀon sang dêh čar jao. Khŏm ngă tui tơlơi phiăn, hyu hơduah ĕp, wai lăng mrô prăk mă yua; bơtơhmal kơtang hăng ƀing ngă soh, ngă huač prăk kơnuk kơna hơmâo ƀuh hơduah ĕp, jŭ yap.

Khă hnun, mơng bruă hơduah ĕp, sem lăng hăng jŭ yap mơng Sang pioh prăk Kơnuk kơna ƀuh bruă wai lăng, mă yua prăk kơnuk kơna aka ƀu djơ̆ hơnong pơkă, hơdră ngă bruă ƀơi sa, dua anom bruă aka ƀu djơ̆. Pơhiăp ƀơi mông jơnum, yă Lê Thị Nga, Khua Jơnum min tơlơi phiăn mơng Ƀirô khua pơ ala mơnuih ƀon sang dêh čar lăi, kiăng bơtơhmal kơtang hơdôm anom bruă ngă kaih hơdră pơkrem prăk, ƀu dưi prai prăk khưi khăi. Biă ñu, pơsir klă bruă arăng prai kông ngăn kah hăng pơtâo čuah, lŏn tơnah, glai rưng, ia yua. Rơngiao kơ anun, dŏ hơmâo lu tơlơi aka ƀu djơ̆ amăng bruă pơhaih rơđah prăk blơi gơnam yua amăng kơnuk kơna:

“Gơmơi pơmin, hơmâo tơlơi aka ƀu djơ̆ amăng bruă blơi, mă yua gơnam kơnuk kơna lĕ yua bruă wai lăng, git gai aka ƀu dưi wai lăng abih tơlơi truh ƀu klă tơdah hơmâo. Amăng bruă pơjuă nua gơnam, ruah pô dưi blơi, blơi sĭ gơnam kơnuk kơna, sa, dua čô khua aka ƀu thâo hluh rơđah kơ tơlơi gơgrong bruă kiăng pơhaih rơđah, lăi pơthâo tŏng ten. Bruă hyu pel ĕp, sem lăng bruă pơhaih rơđah, aka ƀu hơmâo ngă na nao ôh, yua hnun jing aka ƀu tŭ yua đơi ôh. Tơlơi lăp đing nao hăng tơlơi thâo hluh mơng mơnuih ƀon sang kơ tơlơi dưi hmư̆ tơlơi pơhing ăt dŏ tơdu”.

Ơi Bùi Văn Cường, Khua anom bruă pơ ala mơnuih ƀon sang dêh čar lăi kiăng pôr pơthâo hloh dong kiăng mơnuih ping gah mă yua prăk kăk thâo pơkrem, ƀu dưi prai prăk khưi khai ôh ƀơi djŏp anom bruă; git gai lăng glăi bruă hơmâo ngă, pơƀuh djŏp črăn ngă bruă, bruă ngă rơđah rơđông.

“Kiăng pơtrut hơduah ĕp, krăp lăng bruă ngă tui tơlơi pơtrun pơkrem prăk, pơgăn prai prăk kăk mơng rim anom bruă, tơring čar, črâo rơđah tơlơi aka ƀu djơ̆, mơng anun hơmâo hơdră pơsir. Khŏm kiăng hơmâo tơlơi pơkôl pơkă rơđah kơ bruă bơtơhmal ƀing ngă soh, biă ñu lĕ tơlơi gơgrong bruă mơng ƀing khua ăt kah hăng apah bơni, wơ̆t hăng bruă mă bơdjơ̆ nao pơkrem prăk, pơgăn prai prăk kah mơng dưi ngă tơdu hĭ bruă arăng mă yua prăk khưi khai”.

Pơsit hơdră pơkrem prăk, pơgăn prai prăk lĕ tơlơi pơtrun prong amăng hrơi blan lŏn ia ta dŏ rin, Khua git gai pơ ala mơnuih ƀon sang dêh čar ơi Vương Đình Huệ lăi rơđah, tơlơi răm rai yua prai prăk dưm kơnar hăng hưp ham ƀong kông ngăn mơn, tăp năng kơtang hloh. Amăng tơlơi lăi pơthâo mơng Kơnuk kơna hăng tơlơi lăi pơthâo hơduah ĕp mơng Jơnum min khua apăn bruă pơ ala mơnuih ƀon sang dêh čar, lu tơlơi dŏ lăi nao hrŏm hrŏm, kiăng kơ ƀă đôč, aka ƀu sit ôh, dŏ ƀu-eng nao rai, bơbĕ hĭ tơlơi soh.

Khua git gai pơ ala mơnuih ƀon sang dêh čar Vương Đình Huệ pơhiăp ƀơi mông jơnum.

Khua git gai pơ ala mơnuih ƀon sang dêh čar ơi Vương Đình Huệ kiăng, tơlơi lăi pơthâo mơng Kơnuk kơna hăng lăi pơthâo bruă hyu hơduah ĕp bruă pơkrem prăk, pơgăn mă yua prăk khưi khai khŏm kiăo tui jơlan hơdră yua prăk thâo pơkrem mơng thun 2020, biă ñu amăng bruă: prăk kăk, prăk kơnuk kơna, prăk brơi čan, kông ngăn ƀơi lŏn tơnah, ayuh hyiăng, biă ñu lĕ pơkrem hrơi mông, pơđĭ tui mrô gơnam pơkra rai...Pơsir bruă ƀơi anom bơwih ƀong ngă bruă tơdu, sang prăk ngă bruă tơdu. Amăng bruă bơwih brơi kơnuk kơna, khŏm kiăng pơsir anŏ kaih lơ̆m čuk pơkra, tuh pơ alin bruă kơnuk kơna, tuh pơ alin mơng anom bơwih ƀong, kiăng mơnuih ƀon sang thâo pơkrem mơn:

“Pơgang hưp ham ƀong kông ngăn lĕ tơlơi ƀing ta khŏm ngă yơh, samơ̆ ăt khŏm pơlir hăng bruă pơkrem prăk hăng pơgăn prai prăk. Hơdôm tơlơi hrŏ huač anai aka ƀu yap ba ôh bruă ƀu thâo pơkrem mông mă bruă. Ƀing gih khŏm lăi rơđah hơdôm tơlơi ƀing ta dưi ngă amăng bruă dưm dăp ming mrô biên chế, biă ñu ƀơi hơdôm anih ngă bruă klă. Lu tơring čar, ƀon prong ră anai mrô prăk mă yua re se hơmâo mă ha mơkrah đôč, bơ mă yua amăng bruă tuh pơ alin ăt truh ha mơkrah mơn. Sa, dua anom bruă ngă klă ƀudah bruă bơdjơ̆ nao ngă amuñ bruă hơduah ĕp, ƀing ta kư̆ ba nao amăng hră lăi pơthâo anai yơh, kiăo tui Tơlơi phiăn pơkrem yua prăk, pơgăn prai prăk khưi khai, kiăo tui Tơlơi pơtrun 166 lơ 23 blan 1 thun 2020”.

VOV1: Čih- Siu H’Mai: Pơblang