VOV4.Jarai - Tŏ tui jơlan hơdră Jơnum lok 3 mơng Jơnum min khua apăn bruă pơ ala mơnuih ƀon sang dêh čar, lơ 20/9, yŭ tơlơi git gai mơng Khua git gai pơ ala mơnuih ƀon sang dêh čar ơi Vương Đình Huệ, Jơnum min khua apăn bruă pơ ala mơnuih ƀon sang pơgôp hiăp kơ hră lăi pơthâo glăi bruă mă amăng thun 2021 mơng anom bruă Tơlơi phiăn. Bơkơtuai ƀơi mông jơnum, Jơnum min khua apăn bruă pơ ala mơnuih ƀon sang dêh čar lăi glăi, hơdôm tơlơi lăi pơthâo mơng Kơnuk kơna, Sang phăt kơđi, Sang bruă wai lăng bruă ngă tui tơlơi phiăn mơng djŏp anom bruă hơmâo prăp lui rơđah rơđông, hơmâo lu tơlơi pơplih phrâo. Khă hnun, kiăng hơdôm anom bruă ngă rơđah hloh hơdră pơsir bruă đah mơng pơtrut đĭ hơdôm tơlơi dưi ngă amăng bruă pơgang, pơgăn ƀing ngă soh, hăng pơgăn tơlơi hưp ham ƀong kông ngăn; laih dong kiăng ƀư̆ pơkra tơlơi aka ƀu dưi ngă, ngă rơđah yua hơget hơmâo tơlơi ngă soh phrâo đah mơng thâo pơsir; kiăng pơkra giong tơlơi phiăn, dưm dăp mơnuih ngă bruă klă, pơplih mơnuih ngă khua, git gai wai lăng, ngă hrŏm nao rai klă hloh, amăng anun lăng ba bruă pơkra, pơhrua tui tơlơi phiăn, hơdră djru, hơdôm tơlơi rơkâo đĭ rơđah rơđông hăng ƀing khua git gai pơ ala mơnuih ƀon sang dêh čar, Jơnum min khua apăn bruă git gai pơ ala mơnuih ƀon sang dêh čar.

Siu H’Mai: Pơblang