VOV4.Jarai - Hăng tơlơi git gai mơng Khua pơ ala mơnuih ƀon sang dêh čar ơi Vương Đình Huệ, Jơnum min khua apăn bruă pơ ala mơnuih ƀon sang dêh čar phrâo jơnum ječ hơduah tơña, pơgôp hiăp kơ tơlơi pơtrun mơng Kơnuk kơna kơ hơdră ngă bruă ječ ameč pơgang klin Covid-19 tui Tơlơi pơtrun mrô 30 mơng Khua mua pơ ala mơnuih ƀon sang dêh čar hơmâo pơtrun ƀơi mông Jơnum lok 1, Khua pơ ala mơnuih ƀon sang dêh čar tal 15.

Mơmot lơ 5/8 phrâo rơgao, Khua dêh čar hơmâo kĭ Hră mrô 1067 rơkâo tơlơi pơgôp hiăp mơng Jơnum min khua apăn bruă pơ ala mơnuih ƀon sang kơ hơdră ngă bruă hơdeč hmar pơhlôm pơgang klin Covid-19 laih anun amăng lơ 6/8, Kơnuk kơna hơmâo dong mơn Hră pơdah pơƀuh rơkâo tơlơi pơgôp hiăp mơng Jơnum min apăn bruă pơ ala mơnuih ƀon sang brơi Kơnuk kơna pơsit hơdră ngă bruă lơ̆m hơmâo tơlơi truh ječ ameč mơng Tơlơi phiăn.

Kiăo tui bruă sem lăng tơlơi pơtrun čih pơkra hlâo mơng Kơnuk kơna, ding kơna mơng Jơnum min apăn bruă pơ ala mơnuih ƀon sang tŭ ư hăng 4 mơta tơlơi phrâo phara hăng tơlơi phiăn ră anai ƀudah yua Jơnum min apăn bruă pơ ala mơnuih ƀon sang dưi pơsit, tui tơlơi pơtrun mrô 30 mơng Khua pơ ala mơnuih ƀon sang dêh čar.

Tŏng ten ñu, brơi hơdôm Ding jum ia jrao, Ling tơhan, Kông ang, Jơnum min mơnuih ƀon sang hơdôm boh tơring čar akŏ pơdong anih čơkă, pơjrao mơnuih ƀă kman Covid-19 laih dong jing hră brơi mă bruă laih anun rơkâo kiăng ngă sui dong hrơi pơkă mă yua tơlơi pơtrun, truh abih thun 2022 laih dong dưi mă yua lơ̆m hơmâo tơlơi ječ ameč amăng bruă pơgang klin Covid-19 tui tơlơi pơtô ba pơgang klin hăng kiăo tui tơlơi hơmâo sit nik ƀơi rim tơring čar mơn.

Jơnum min apăn bruă pơ ala mơnuih ƀon sang dêh čar tŭ ư hăng Tơlơi pơtrun pơkôl pơkă djŏp bruă, bruă tla prăk khăm pơjrao tơlơi ruă kơ ƀing ƀă kman Covid-19, wơ̆t hăng prăk pơjrao tơlơi ruă pơkŏn amăng mông pơjrao Covid-19 yua kơnuk kơna ta djru brơi. Khă hnun, Jơnum min apăn bruă kiăng hăng ƀing ƀă klin Covid-19 hơmâo tơlơi ruă pơkŏn kah hăng ruă mơañă tơbiă ia sik, ruă hơtai boh, boh ƀleh lĕ bruă khăm pơjrao tơlơi ruă hăng ƀing anai khŏm kiăo tui tơlơi pơkă mơng Tơlơi phiăn prăk pơhlôm nua ia jrao hăng tơlơi pơkă pơkŏn.

Jơnum min apăn bruă pơ ala mơnuih ƀon sang dêh čar tŭ ư jao kơ Jơnum min pơ ala mơnuih ƀon sang tơring čar pơsit hơdôm bruă yua Jơnum min pơ ala mơnuih ƀon sang dưi pơsir laih anun lăi pơthâo kơ Jơnum min pơ ala mơnuih ƀon sang tơring čar ƀơi mông jơnum giăm hloh đah mơng pơhlôm lăp djơ̆ hăng hrơi blan hơmâo lu tơring čar glăk ngă tui hơdră pơgang klin khut khăt kah hăng ƀu brơi dŏ pơƀut lu mơnuih, brơi pơčlah abih mơnuih mơnam. Kơ tơlơi anai, Jơnum min apăn bruă pơ ala mơnuih ƀon sang dêh čar kiăng ƀing khua mua git gai črâo bruă klă hloh dong, anăm pơhmao mă tơlơi pơtrun anai mơ̆ pơsit brơi bruă aka ƀu kiăng đơi, ƀu djơ̆ nao bruă pơgang klin Covid-19 ƀơi plơi pla.

Jơnum min apăn bruă khua pơ ala mơnuih ƀon sang dêh čar pơsit hơdôm bruă ječ ameč amăng pơhlôm, pơgang klin Covid-19.

Pơhiăp ƀơi mông jơnum, Khua git gai pơ ala mơnuih ƀon sang ơi Vương Đình Huệ lăi, bruă ngă tơlơi pơtrun anai kiăng biă mă, ječ ameč amăng hrơi mông klin kơtang, ƀă hyu prong ƀơi lu tơring čar, plơi prong, biă ñu lĕ hơdôm boh tơring čar kual Dơnung:

“Amăng tơlơi pơtrun ƀu dưi mă yua boh hră ƀu rơđah rơđông kah hăng hmar hloh, prong hloh, hŭi hluh ƀu djơ̆, ngă sư̆ rơbư̆ kơ hơdôm tơring čar amăng bruă mă yua, đa lĕ arăng jing mă yua ča čot. Sit nik brơi ƀuh, hơdră djru klă biă mă, samơ̆ ƀơi anŏ ñu arăng ngă aka ƀu djơ̆ lơi, pơ anai ngă pha, pơ adih ngă pha mơn. Tuč rơnuč ngă tơnap kơ bruă ba hyu gơnam hăng bruă nao rai mơng mơnuih ƀon sang, biă ñu bruă pơgang kual mơtah, kual mơriah. Hrơi blan pơ anăp, kiăng Kơnuk kơna git gai pơtrun hră črâo rơđah hơdôm tơlơi hơmâo amăng tơlơi pơkă mơng Kơnuk kơna, mơng Khua dêh čar. Sem lăng kah pơpha gưl mă bruă kơtang hloh, biă ñu amăng bruă ngă tui. Hơdôm bruă bơdjơ̆ nao không bruă, khut khăt khŏm djơ̆ hrŏm. Amăng bruă ječ ameč lĕ khua mua git gai pơƀut sa mơta bruă anun yơh yôm hloh. Biă ñu amăng bruă pơphun, ƀudah hơdôm bruă mơ̆ Kơnuk kơna, Khua dêh čar ta pơtrun, bĕ hĭ tơlơi mơng ngŏ lăi phara, gah yŭ ngă phara”.

Khua git gai pơ ala mơnuih ƀon sang dêh čar pơhiăp klah čun glăi mông jơnum.

Tơdơi kơ anun, Khua git gai pơ ala mơnuih ƀon sang dêh čar ơi Vương Đình Huệ kĭ tơlơi pơtrun mrô 268 brơi Kơnuk kơna dưi pơtrun sa, dua tơlơi pơkŏn phara hăng tơlơi pơkôl pơkă mơng tơlơi phiăn kiăng djơ̆ hăng tơlơi kiăng pơgang klin Covid-19. Tui anun, Khua pơ ala mơnuih ƀon sang dêh čar tŭ ư hăng tơlơi rơkâo mơng kơnuk kơna kơ bruă čih pơkra tơlơi pơtrun mơng Kơnuk kơna pioh ngă hơdră tơlơi pơsir ječ ameč amăng bruă pơgang klin Covid-19 tui Tơlơi pơtrun mrô 30/2021/QH15 lơ 28 blan 7 thun 2021 mơng Ƀirô khua pơ ala mơnuih ƀon sang dêh čar tal 15, amăng anun hơmâo hơdôm mơta tơlơi: Pơsit akŏ pơdong anih čơkă pơjrao mơnuih ƀă kman Covid-19 laih dong anai lĕ hră brơi mă bruă; jao kơ Ding jum ia jrao pơsit mă hơdôm hră pơ-ar kiăo tui thông tư, ngă amuñ, hmar ƀiă hră pơ-ar amăng mông pơgang klin; jao kơ khua mua pơ ala mơnuih ƀon sang pơsit hơdôm bruă yua Jơnum min pơ ala mơnuih ƀon sang dưi pơsir, laih anun lăi pơthâo kơ Jơnum min pơ ala mơnuih ƀon sang tơring čar ƀơi mông jơnum jê̆ hloh.

Hăng tơlơi pơkôl bruă tla prăk nao khăm pơjrao kơ mơnuih ƀă kman Covid-19 ƀơi hơdôm anih čơkă pơjrao mơnuih ƀă kman Covid-19 (wơ̆t hăng  prăk pơjrao tơlơi ruă pơkŏn amăng mông pơjrao Covid-19) yua kơnuk kơna ta pơhlôm tla brơi tui mrô prăk kiăng tla, Kơnuk kơna git gai kiăo tui tơlơi pơtô ba mă yua prăk kơnuk kơna tla brơi abih prăk khăm pơjrao tơlơi ruă bơdjơ̆ nao bruă pơjrao Covid-19; hăng ƀing ƀă kman Covid-19 hơmâo tơlơi ruă pơkŏn dong lĕ bruă tla prăk khăm pơjrao tơlơi ruă hăng ƀing anai kiăo tui tơlơi pơkă mơng Tơlơi phiăn pơhlôm pơgang klin duam ră ƀă hyu, Tơlơi phiăn prăk pơhlôm nua ia jrao hăng tơlơi pơkă pơkŏn mơng tơlơi phiăn bơdjơ̆ nao. Tơlơi pơtrun dưi mă yua mơng lơ 6/8/2021.

VOV1: Čih - Siu H’Mai: Pơblang