VOV4.Jarai - Mơguah lơ 1/10, amăng mông jơnum lăng nao rai mơng ataih, sem lăng hră lăi pơthâo Kơnuk kơna kơ bruă wai lăng hăng mă yua Keh prăk pơhlôm nua ia jrao thun 2020; ngă tui tơlơi pơsit mrô 68 mơng Khua pơ ala mơnuih ƀon sang dêh čar tal 13 kiăng pơtrut bruă ngă tui hơdôm hơdră bruă tơlơi phiăn amăng hră pơhlôm nua ia jrao, anăp nao ngă brơi hră pơhlôm nua ia jrao kơ abih bang mơnuih, Jơnum min mơnuih mơnam amăng Ƀirô Khua pơ ala mơnuih ƀon sang dêh čar rơkâo hră pơhlôm nua mơnuih mơnam Việt Nam ngă rơđah dong kơ bruă rơnoh prăk rơbêh 10.150 klai yua anom bruă pơhlôm nua mơnuih mơnam dŏ đom hnưh, aka ƀu tla glăi amăng thun 2020, Jơnum min mơnuih mơnam rơkâo Kơnuk kơna tañ mơ-it hră pơ-ar Ƀirô Khua pơ ala mơnuih ƀon sang dêh čar kơ Tơlơi phiăn hră pơhlôm nua ia jrao (čih pơkra glăi) kiăng kơ hơmâo hơnong pơkă bơwih brơi tơlơi suaih pral kơ abih bang mơnuih, laih dong, đing nao čih pơkra hơdôm boh tơhnal amăng hră pơhlôm nua ia jrao bơdjơ̆ naobruă čih pơkra glăi Tơlơi phiăn khăm pơjrao. Amăng mông jơnum, Jơnum min mơnuih mơnam ăt rơkâo Ding jum ia jrao pel ĕp glăi hơdôm črăn tơlơi phiăn kơ hră pơhlôm nua ia jrao, khăm pơjrao tơlơi ruă mơng anun čih pơkra glăi kiăng pơsir hĭ tơnap tap, gun găn ră anai; rơkâo pơplih brơi lăp djơ̆ kiăng pơhlôm tơlơi dưi kơ mơnuih ƀon sang lơ̆m blơi hră pơhlôm nua ia jrao, pơhlôm khăm pơjrao hăng ngă bơkơnar keh prăk pơhlôm nua ia jrao.

Siu Đoan: Pơblang