VOV4.Jarai - Mơguah lơ 10/12, tŏ tui mông jơnum lok 4, Jơnum min pơ ala mơnuih ƀon sang tơring čar Gia Lai tal 12, ƀing khua hơmâo lăi pơthâo bruă bơkơtuai hăng lu tơlơi yôm phun. Ƀơi mông jơnum, ƀing khua tŭ ư hăng tơlơi lăi pơthâo bruă bơwih ƀong huă, mơnuih mơnam, tơlơi git gai mơng Jơnum min mơnuih ƀon sang tơring čar amăng thun 2021. Ƀing khua lăi, mah bưp ƀu ƀiă ôh tơlơi tơnap tap, tơlơi lông yua klin Covid-19 ngă, samơ̆ tơlơi bơwih ƀong huă - mơnuih mơnam amăng tơring čar Gia Lai thun anai hơmâo lu mơn tơlơi dưi.

Khua pơ ala Lưu Trung Nghĩa, Khua Gơnong bruă ngă hmua hăng pơđĭ kyar plơi pla tơring čar Gia Lai lăi nao kơ bruă djru blơi gơnam mơng hmua kơ mơnuih ƀon sang

Rơngiao kơ anun, sam dua bruă aka ƀu dưi ngă ăt hơmâo ƀing khua lăi nao tơpă, pơčrông nao rai ƀơi mông jơnum. Amăng anun, bruă pơtô hrăm mơng ataih tui internet, bruă djru blơi sĭ gơnam mơng hmua kơ neh met wa amăng hrơi hơmâo klin hơmâo ƀing khua lăi nao lu biă. Tơlơi ƀu dưi mơng bruă hrăm amăng internet lĕ ƀing ta kơnong dưi pơtô hrăm ƀơi kual bơwih ƀong đĭ đôč, yua hnun ƀing čơđai pơ kual tơnap tap lĕ ƀu dưi hrăm. Bruă djru ba mơnuih ƀon sang, anom ngă ƀong hrŏm blơi gơnam mơng hmua ăt aka ƀu klă đơi lơi amăng bơyan klin kheng, kiăng ĕp hơdră ngă bruă klă hloh.

Siu H’Mai: Pơblang