VOV4.Jarai-Mơguah lơ 22/11, Khua dêh čar ơi Phạm Minh Chính ba jơlan hlâo grup khua mua kơnuk kơna Việt Nam hrom hăng khua mua amăng kual ASEAN laih anun Khua mir sir dêh čar Khač ơi Tập Cận Bình jơnum hrom mơ̆ng ataih, lăng nao rai amăng tivi pơčrông sai jơnum prong yôm hloh hơdor glăi 30 thun rô nao rai kơplah wah ASEAN-Khač.

Pơhiăp đĭ ƀơi mông jơnum, anăp nao kơñ pơgi, Khua dêh čar ta ơi Phạm Minh Chính lăi pơtong, ASEAN hăng Khač kiăng ngă kjăp glăi pran jua đăo kơnang hăng pơtrut bruă ngă hrom hlom bom, pơđĭ tui boh tŭ yua, anăp nao kơ hơdôm tơhnal pơtrun lu hloh, boh tŭ yua prong tui kơ tơlơi rô nao rai ASEAN-Khač.

Khua dêh čar lăi, kiăo tui kơ atur ngă giăng mah jĕ giăm ieo gah, tơlơi ngă hrom mơ̆ng đưm hlâo hiam klă hăng dêh čar Khač, Việt Nam ăt amra gir run pơtrut tui hăng pơbŭ đĭ tơlơi ngă giăng mah ASEAN-Khač pơđĭ kyar djơ̆ hnong, pơgôp hrom lu, kơtưn pơgang tơlơi rơnuk rơnua, hơđong, gum hrom, pơđĭ kyar kjăp ƀơi kual hăng amăng rŏng lŏn tơnah, ba glăi  kơ rĭm boh dêh čar kiăng trơi pơđao yâo mơak kơ mơnuih ƀôn sang, ƀu lui kơ hlơi dŏ glăi pơ klôn ôh.

Nay Jek: Pơblang