VOV4.Jarai-Lơ 5/9, hrom hăng amăng dêh čar ta, djop tơring čar kual Dap Kơdư hơmâo jơnum ngă lơphet mut thun hrăm phrâo 2021-2022 amăng hrơi mông klin Covid 19 hlăk tơnap tap. Jing tơring čar ƀơi kual Dap Kơdư aka ƀu hơmâo mơnuih ƀă klin covid 19 amăng plơi pla, samơ̆ kiăng pơhlôm pơgang klin, Jơnum ngă lơphet mut thun hrăm phrâo 2021-2022 dưi hơmâo anŏ bruă pơtô hăng pơhrăm tơring čar Kon Tum pơphun jơnum lăng nao rai amăng tivi, pơdah amăng gong pơdah rup, pơtui jua pơhiăp hmao klôn laih anun pok amăng internet.

Čơđai sang hră Kon Tum mut thun hrăm phrâo aset đôč mơnuih

Thun hrăm phrâo, tơring čar Kon Tum hơmâo rơbêh 164 rơbâo čô čơđai sang hră mơ̆ng gưl muai truh gưl klâo. Tơdơi kơ jơnum pok thun hrăm phrâo, hrơi lơ 6/9, čơđai sang hră amăng tơring čar hlong hrăm hrơi tal blung a tui hơdră lăng nao rai amăng tivi. Tơring čar hơmâo jao kơ djop sang hră ĕp mă hơdră pơphun tui hluai tơlơi gêh găl, pơpha khul čơđai sang hră tong ten brơi hrăm tui hơdră lăng nao rai amăng tivi kiăng tŭ yua hloh.

Nay Jek: Pơblang

Ăt pơphun jơnum mut thun hrăm phrâo kơdrưh yôm, pơphun amăng ƀiă pơdah amăng tivi, rơbêh 392 rơbâo čô čơđai ƀơi 174 boh sang hră ƀơi tơring čar Gia Lai prăp giong laih kơ thun hrăm phrâo. Kiăng lăp djơ̆ hăng hrơi glăk hơmâo klin, mơng lơ 6/9, anom bruă pơtô hrăm Gia Lai pơphun pơtô hrăm tui dua hơdră. Tui anun, ƀing čơđai sang hră ƀơi dua kual glăk ngă tui tơlơi pơčrâo trun mrô 16 mơng Khua dêh čar lĕ plơi prong Pleiku hăng tơring kual Phú Túc (Krông Pa) amra hrăm lăng amăng plang internet.

Gia Lai jơnum mut sang hră hơmâo pơdah pơƀuh amăng tivi mơng Sang hră gưl 3 chuyên Hùng Vương (plơi prong Pleiku)

Čơđai sang hră ƀơi hơdôm boh plơi pla dŏ glăi lĕ nao hrăm pơ sang hră. Hơdôm boh sang hră ƀơi Gia Lai hơmâo prăp lui djŏp laih gơnam yua, măi mok, prăp lui kơ bruă pơtô hrăm mơng ataih. Ƀơi Dak Lăk, hơdôm boh sang hră ăt pơphun jơnum mut thun hrăm phrâo 2021-2022 amăng mơguah lơ 5/9 lăng nao rai amăng tivi mơn, pơphun amăng ƀiă, pơdah pran jua thâo djru nai rai, juh alum pran jua ƀing čơđai, nai pơtô dưi găn rơgao tơnap tap đah mơng ngă truh kih bruă pơtô hăng hrăm.

Čơđai ƀơi Dak Lăk hơmâo jơnum mut sang hră lăng amăng internet

Thun hrăm anai, tar ƀar tơring čar Dak Lăk hơmâo rơbêh 450.000 čô čơđai djŏp gưl. Ƀơi anăp tơlơi klin kheng, tơring čar pơdơi hĭ jăng jai hrơi hrăm, kơdun glăi truh lơ 15/9 pơ anăp dong, kiăng anom bruă pơtô hrăm hăng mơnuih ƀon sang hơmâo mông prăp lui klă djŏp tơlơi kiăng amăng hrơi pơtô hrăm.

Hăng tơlơi prăp rơmet klă tui anun mơn, Dak Nông jing tơring čar ha sa ñu yơh ƀơi kual Dap Kơdư pơphun Jơnum mut thun hrăm phrâo ƀơi hơdôm boh sang hră, samơ̆ ngă tui tơlơi pơčlah mơnuih mơnam 50-50. Hơjăn tơring čar Lâm Đồng amra brơi čơđai sang hră nao hrăm amăng lơ 15/9 hăng pơphun jơnum mut thun hrăm phrâo amăng lơ 18/9.

Siu H’Mai: Pơblang