VOV4.Jarai - Tlam lơi 17/11, Hrơi ngui ngor gum pơgôp djuai ania ăt hơmâo pơphun ƀơi plơi Đăk Dơn (Đăk Yơn), să kual ataih Măng Ri, tơring glông Tu Mơ Rông, tơring čar Kon Tum. Plơi Đăk Dơn ră anai hơmâo 100 boh sang anŏ, giăm 350 čô mơnuih, abih bang lĕ djuai ania Sêdang. Hơdôm thun giăm anai, anih anom, tơlơi hơdip mơng mơnuih ƀon sang ƀơi anai pơplih lu laih yua pla phun pla yôm sĭ hơmâo prăk, kah hăng sâm Ngọc Linh, hồng đẳng sâm, kơphê kual lŏn rơ-ơ̆....

Hrơi jơnum ngui gum pơgôp djuai ania plơi Đăk Dơn, să Măng Ri.

Amăng hrơi ngui ngor gum pơgôp djuai ania, mơnuih ƀon sang plơi Đăk Dơn atông čing, ayun suang, pơƀuh gơnam ƀong huă jơman; ƀuăn gir hơmâo 100% mrô sang anŏ mă hră bơni sang anŏ hơdip hiam; pơtrut tui hơbô̆ bruă pơtruh nao rai pla sâm Ngọc Linh hăng anom bơwih ƀong; gir man pơdong plơi pla phrâo, pơmin mă pô ngă tui tơlơi kĭ pơkôl amăng plơi pla hăng ngă tui tơlơi phiăn. Ngui ngor mơ-ak hrŏm hăng neh met wa plơi Đăk Dơn, ơi Dương Văn Trang, Khua git gai Ping gah, Khua Jơnum min mơnuih ƀon sang tơring čar Kon Tum bơni kơ tơlơi gir run mơng mơnuih ƀon sang amăng bruă pơđĭ kyar tơlơi bơwih ƀong huă, mơnuih mơnam, laih dong pơtô brơi hơdră ngă bruă đah mơng pơđĭ tui tơlơi gêh gal mơng kual pla sâm Ngọc Linh.

Siu H’Mai: Pơblang