VOV4.Jarai - Tal hơdor glăi 100 thun hrơi tơkeng ơi Lê Quang Đạo (8/8), mơguah hrơi anai (7/8), Anom pơtô bruă kơđi čar ƀôn prong Hồ Chí Minh gum hrŏm hăng Anom pơtô bruă Ping gah dêh čar, anom bruă Khua pơ ala mơnuih ƀon sang dêh čar  hăng Ping gah tơring čar Bắc Ninh pơphun jơnum bơkơtuai tơlơi thâo thăi gưl dêh čar hăng anăn “Ơi Lê Quang Đạo hăng bruă ngă hơkrŭ ƀơi Việt Nam laih dong hăng tơring čar Bắc Ninh”. Thun blan hơdip hăng bruă mă mơng ơi Lê Quang Đạo pơlir hăng hơdôm tơlơi pơplih prong prin amăng lŏn ia ta amăng rơbêh 60 thun rơnuč thun 2000. Găn rơgao lu bruă yôm phun, mah mă bruă hơget, amăng rơnuk pơpă tŭ mơn, ơi Lê Quang Đạo lêng abih pran jua amăng bruă mă, ngă pơgiong djop bruă jao. Hăng tơlơi gơgrong lĕ ngă Khua git gai pơ ala mơnuih ƀon sang dêh čar, ñu hơmâo pơgôp prong pran ba hơdră pơplih phrâo mơng Ping gah amăng bruă pơplih bruă amăng Ƀirô Khua pơ ala mơnuih ƀon sang dêh čar, biă mă ñu lĕ pơtrut bruă čih pơkra tơlơi phiăn kiăng kơ dưi mă yua sit nik hơdôm tơlơi pơsit mơng Ping gah, djơ̆ hăng tơlơi rơkâo amăng wai lăng lŏn mơnai djơ̆ hăng tơlơi phiăn.

Siu Đoan: Pơblang