VOV4.Jarai - Mơguah tom brơi (20/9) ƀơi Ƀirô Kơnuk kơna, Kơ-iăng khua dêh čar ơi Lê Văn Thành git gai jơnum lăng nao rai mơng ataih “Pơsir hĭ tơnap tap, gun găn brơi hơdôm anom bơwih ƀong sĭ mơdrô ƀơi hơdôm sang măi pơkra pơjing, kual bơwih ƀong huă, kual pơkra pơjing gơnam tam măi mok hăng hơdôm sang măi”.

Pơđut mông jơnum, Kơ-iăng Khua dêh čar ơi Lê Văn Thành rơkâo hơdôm anom bơwih ƀong sĭ mơdrô pơjing akŏ bruă kiăng hơkrŭ glăi bơwih ƀong huă, pơhlôm hơđong brơi mơnuih mă bruă amăng pơgang klin rah mă bruă ruah; gum hrŏm hăng gong gai ƀon lan kiăng kơ hơmâo hơdră tlâ̆o vaccine brơi mơnuih mă bruă, pơphun pơčrang lăng tui hrơi mông pơkă, pơhlôm ƀu hơmâo hơmâo F0 amăng anih mă bruă, gơgrong glăm ba ƀơi anăp gong gai, anăm brơi ƀuh mơnuih ƀă klin amăng anih mă bruă. Laih dong rơkâo Ding jum ia jrao hơmâo akŏ bruă tong ten kiăng kơ kah pha vaccine brơi hơdôm ƀon lan lĕ hơdôm kual bơwih ƀong huă, pơkra pơjing gơnam, črâo ba hơdôm hơdră pơgang klin, pơhlôm rơnuk rơnua brơi mơnuih mă bruă.

Siu Đoan: Pơblang