VOV4.Jarai - Hăng tơlơi pơtrun “mă pran mơnuih ƀon sang wai lăng ba tơlơi hơdip mơnuih ƀon sang”, 5 thun pơphun ngă, Bruă iâu pơthưr “Abih bang mơnuih gum pơgôp man pơdong plơi pla phrâo, plơi prong hơdip hiam” jing ba glăi lu tơlơi dưi yôm, djru pơplih phrâo ƀô̆ adung mơta amăng plơi pla hăng plơi prong amăng dêh čar ta hăng mơng rim kual plơi pla. Anai lĕ tơlơi pơsit mơng ƀing khua ƀơi mông Jơnum pơđut 5 thun ngă tui Bruă iâu pơthưr yua Jơnum min djŏp djuai ania mơnuih mơnam Việt Nam pơphun mơguah lơ 15/12, ƀơi Hà Nội. 5 thun rơgao, hơdôm boh tơring čar hơmâo pơhrui glăi hơdôm rơtuh klai prăk pioh man pơkra anih anom kiăng yua amăng plơi pla. Yap truh blan 11/2020, dêh čar ta hơmâo 5 rơbâo 392 boh să (hơmâo 65%) djơ̆ hnong pơkă plơi pla phrâo. Mơng hơdôm anih jơnum pơtruh nao rai, pơ ala kơ hơdôm tơring čar ƀon prong, lăi pơthâo tơlơi dưi ngă, hơdră ngă phrâo, laih dong ba pơƀuh hơdră ngă bruă klă hloh đah mơng dưi iâu pơthưr abih bang gum ngă amăng thun blan pơ anăp.

Siu H’Mai: Pơblang