VOV4.Jarai-Tơdơi kơ 3 hrơi mă bruă, truh tlam lơ 29/12, Jơnum bruă mă gah Kông an đơ đam dêh čar tal 77 pơđut laih. Đĭ pơhiăp klah čun Jơnum, Khua ding jum kông an ơi Tô Lâm pơtă, kông an djop anom bruă, djop tơring čar ăt khom pơblih phrâo bruă mă, pơtong rơđah bruă mă glăm ba, tơlơi gơgrong mơ̆ng djop sang bruă, rĭm čô khua mua, mơnuih ngă tơhan kông an amăng bruă jĕ giăm ană plơi hăng akŏ pơjing bruă mă hrom abih bang mơnuih ƀôn sang pơgang tơlơi rơnuk rơnua dêh čar; Kơtưn bruă mă pơtom hiăp, ngă hrom jar kmar; pơđĭ tui hloh boh tŭ yua, boh tơhnal bruă mă.

Khua ding jum kông an ơi Tô Lâm đĭ pơhiăp pơđut jơnum

Ơi Tô Lâm Khua ding jum rơkâo, kông an djop anom bruă, tơring čar, plơi pla ăt sem lăng tơlơi pơhing, ngă tui khut khăt hră pơčrâo trun, tơlơi pơtrun git gai mơ̆ng Khul khua apăn bruă ping gah dêh čar, kơnuk kơna, Khua dêh čar, khua mua git gai pơhlôm, pơgang klin Covid 19. Djop anom bruă, sang bruă khom git gai kơtang hloh amăng bruă mă kơsung mă, pơgăn ƀing soh sat, ƀing mơnuih soh sat đuăi kơdop, kiăng pơgang bơyan ngă yang thun phrâo ƀong tết Nhâm Dần rơnuk rơnua kơ ană plơi pla.

Nay Jek: Pơblang