VOV4.Jarai - Lơ 9/11, Khua ding jum pơtom hiăp ơi Bùi Thanh Sơn hăng Khua ding jum pơtom hiăp Australia yă Marise Payne git gai mông Jơnum pơtom hiăp ASEAN - Australia kơ đah kơmơi, tơlơi rơngai, rơnuk rơnua tal 2, jơnum bưp ƀơi anăp hăng jơnum mơng ataih. Nao pơhmư̆ hơmâo Khua djru bruă čih pioh hră pơ-ar ASEAN ơi Lim Jock Hoi hrŏm hăng ƀing khua hơdôm boh dêh čar ASEAN, khua anih jưh, khua pơ ala hơdôm boh dêh čar ASEAN hăng Australia ƀơi Hà Nội; ƀing rơgơi kơhnâo mơng hơdôm anom bruă kơsem min boh thâo amăng kual...Pơhiăp ƀơi mông pơphun jơnum, Khua ding jum pơtom hiăp Bùi Thanh Sơn pơsit, mông jơnum jing tơlơi yôm pơtrut đĭ Jơlan hơdră ngă bruă kơ đah kơmơi, tơlơi rơngai hăng rơnuk rơnua kiăo tui tơlơi ngă hrŏm hăng Australia, kiăng pơsit rơđah hloh tơlơi gơgrong bruă yôm mơng ƀing đah kơmơi. Dong mơng hrơi pơtom hiăp ASEAN - Australia tal blung a kơ đah kơmơi, tơlơi rơngai, rơnuk rơnua pơphun amăng blan 4/2018, Australia gir ngă hrŏm hăng ASEAN hloh gah tơlơi anai.

Siu H’Mai: Pơblang