VOv4.Jarai - Mơguah hrơi anai (25/11), ƀơi Ƀirô Kơnuk kơna, Kơ-iăng Khua dêh čar ơi Lê Văn Thành git gai jơnum sem lăng kơ akŏ bruă man pơkra anih anom, jơlan glông ƀơi kual lŏn dăo ia krông Cửu Long rơwang thun 2021-2030, anăp nao thun 2050. Akŏ bruă ƀơi kual lŏn dăo ia krông Cửu Long rơwang thun 2021-2030, anăp nao thun 2050 lĕ akŏ bruă man pơkra anih anom, jơlan glông yôm phăn kiăng pơđĭ kyar amăng kual lăi hrŏm hăng 13 boh tơring čar amăng kual hnun mơn. Bruă dưm dăp man pơkra amăng kual lŏn dăo ia krông Cửu Long kiăng kơ pơsit tong bruă pơđĭ kyar, dưm dăp hăng kah pha mă yua prăk kak amăng bơwih ƀong huă - mơnuih mơnam, bruă ling tơhan, pơhlôm rơnuk rơnua, wai pơgang anih dŏ hơdip jum dar, anai lĕ bơdjơ̆ nao djop anom bruă, djop kual hăng pơlir djop tơring čar kiăng kơ tŏ ngă tui tơlơi dưi, tơlơi yôm amăng kual, jak iâu hăng mă yua lăp djơ̆ hơdôm rơnoh prăk kiăng pơđĭ kyar kual lŏn dăo ia krông Cửu Long truh thun 2050 jing kual pơđĭ kyar kơtang hloh pơhmu hăng đơ đam dêh čar tui tơlơi rơkâo amăng hră pơsit mrô 120 mơng Kơnuk kơna.

Siu Đoan: Pơblang