VOV4.Jarai - Tlam tom brơi (10/9), Ding kơna Ding jum kơđi čar, Kơ-iăng Khua dêh čar ơi Phạm Minh Chính hrŏm hăng Ding kơna Ding jum kơđi čar, Khua ding jum pơtom hiăp dêh čar Khač ơi Vương Nghị git gai hrŏm mông jơnum tal 13 Jơnum min git gai ngă hrŏm kơplah wa Việt Nam - Khač.

Amăng jơnum anai, dua bơnah tŭ ư pơtrut pơphun mông nao čuă jơmư tơdruă; pok pơhai tŭ yua ngă hrŏm kơplah wah Ping gah; ngă tui tơlơi gơgrong yôm phăn mơng Ding jum pơtom hiăp dua bơnah amăng bruă git gai, pơtrut rô nao kơplah wah dua bơnah; pok pơhai klă hơdôm hơdră pơbưp, ngă hrŏm amăng djop mơta bruă anun lĕ ling tơhan, pơhlôm rơnuk rơnua, phat kơđi tơlơi; pơlăi nao rai tơlơi găn rơgao hăng ngă hrŏm amăng pơgang klin Covid-19, amăng anun hơmâo gum hrŏm gah vaccine. Ơi Vương Nghị lăi pơthâo Khač amra djru brơi dong 3 klăk liều vaccine brơi Việt Nam amăng thun anai, đĭ tui mrô vaccine djru brơi mơng dêh čar Khač lĕ 5 klăk 700 rơbâo liều. Kơ bruă amăng kual ia rơsĭ, dua bơnah tŭ ư amra ngă tui hơdôm tơlơi pơsit hrŏm, pơsir hĭ hơdôm tơlơi pơmĭn phara, ƀu ngă bruă hơget tơnap tap tui, pok prong anih bơrơsua, gum hrŏm pơhlôm rơnuk rơnua, hơđong amăng kual ia rơsĭ Ngŏ.

Siu Đoan: Pơblang