VOV4.Jarai - Lơ 12/11/2020, Khua dêh čar ta hơmâo pơtrun tơlơi pơsit mrô 33/2020/QĐ-TTg kơ hơnong pơkă kual mơnuih djuai ania ƀiă hăng kual ataih, asuek tui hăng tơlơi dưi amăng pơđĭ kyar rơwang thun 2021-2025. Anai lĕ anŏ yôm phun kiăng kơ djop ƀon lan pok pơhai hơdôm hơdră pơmut hrŏm, sit nik hăng tŭ yua hăng rĭm kual mơnuih djuai ania ƀiă, djơ̆ hăng tơlơi rơkâo sit nik.

Tui hăng Tơlơi pơsit, hơdôm plơi pla tŭ yua lĕ anih dŏ tơnap tap hloh amăng kual mơnuih djuai ania ƀiă hăng kual ataih, asuek lĕ hơdôm plơi pla hơmâo mrô sang anŏ djuai ania ƀiă amăng abih bang mrô sang anŏ dŏ hơdip hơđong jing plơi pla mơng 15% pơ glông laih dong bjơ̆ hăng 1 amăng 2 hơnong pơkă; hơmâo mrô sang anŏ ƀun rin mơng 20% pơ glông (kơnong hơdôm kual lŏn ia dăo Cửu Long hơmâo mrô sang anŏ ƀun rin mơng 15% pơ glông ƀudah hơmâo rơbêh 30 boh sang anŏ ƀun rin lĕ mơnuih djuai ania ƀiă); hơmâo mrô sang anŏ ƀun rin mơng 15% truh pơ gŭ 20% (kơnong amăng kual lŏn ia dăo Cửu Long hơmâo mrô sang anŏ ƀun rin mơng 12% truh pơ gŭ 15%).

Tui hăng mrô pơkă tal 2, kiăng djơ̆ 1 amăng 3 hơnong pơkă (hơmâo rơbêh 60% mrô sang anŏ ƀun rin lĕ sang anŏ mơnuih djuai ania ƀiă amăng abih bang mrô sang anŏ ƀun rin amăng plơi pla; aka ƀu hơmâo jơlan mơng plơi pla nao pơ să ƀudah hơmâo jơlan yơh samơ̆ găn nao rai tơnap tap, biă mă ñu amăng bơyan hơjan hlim, aka ƀu hơmâo apui lơtrik ƀudah hơmâo laih samơ̆ rơbêh 30% mrô sang anŏ aka ƀu hơmâo apui lơtrik akĕ mơng hrĕ apui lơtrik dêh čar).

Bruă jŭ yap glăi hơdôm plơi pla tơnap tap hloh tui hăng hơnong pơkă amăng pơđĭ kyar lĕ akŏ phun kiăng thâo tong ten tơlơi hơdip kơ ană mơnuih, ƀon lan kiăng kơ pok pơhai ngă tui hơdôm hơdră bruă djru brơi mơnuih djuai ania ƀiă mơng Ping gah, Kơnuk kơna tui rĭm rơwang thun, pơhlôm lăp djơ̆ hăng tơlơi sit nik. Hluai tui anun, djop ding jum, gơnong bruă hăng ƀon lan pơphun ngă tui tŭ yua hơdôm hơnong pơkă pơhrŏ trun ƀun rin hơđong kjăp ƀơi hơdôm kual tơnap hloh amăng bơwih ƀong huă-mơnuih mơnam.

Pơhmutu ƀơi tơring čar Thái Nguyên. Tui hăng hơdră tŭ yap plơi pla tơnap tap hloh amăng kual mơnuih djuai ania ƀiă hăng kual ataih, asuek rơwang thun 2021-2025, Thái Nguyên hơmâo 50 ƀut plơi pla tơnap tap amăng 22 boh să ƀơi 5 boh tơring glông anun lĕ Võ Nhai, Định Hoá, Đồng Hỷ, Phú Lương, Phú Bình. Amăng mrô să, ƀut plơi pla pơklaih mơng sang anŏ tơnap tap hloh amăng tơring čar Thái Nguyên, hơmâo lu plơi pla dưi ngă pơgiong jơlan hơdră man pơdong plơi pla phrâo. Ba truh tơlơi anai lĕ yua dưi mă yua lăp djơ̆ hơdôm hơdră djru, rơnoh prăk djru brơi hơdôm ƀon lan anai, amăng anun hơmâo hơdôm jơlan hơdră man pơdong plơi pla phrâo, jơlan hơdră mrô 135, akŏ bruă 2037, mơng anun ngă pơplih abih bang amăng bơwih ƀong huă-mơnuih mơnam amăng kual mơnuih djuai ania ƀiă, pơplih tơlơi pơmĭn mơng gong gai, kah hăng mơnuih ƀon sang. Ơi Nguyễn Thái Nam, Khua anom bruă djuai ania tơring čar Thái Nguyên brơi thâo:

“Hăng pran jua gir run abih pran jua mơng gưl gong gai ƀon lan, truh pơ thun 2025, ƀing ta amra hrŏ trun ha mơkrah mrô să tơnap tap hloh, gir run truh thun 2030, Thái Nguyên amra ƀu hơmâo plơi pla tơnap tap dong tah”.

Hơnong pơkă ƀu dŏ dong tah plơi pla tơnap tap hloh lĕ sa amăng hơdôm bruă yôm phun amăng hơdră djuai ania, kah hăng kiăng kơ ngă tui sit nik hơdôm tơlơi pơsit mơng Jơnum Ping gah tơring čar Thái Nguyên amăng rơwang pơ anăp dong. Mrô plơi pla, să pơklaih mơng tơnap tap hloh amăng tơring čar Thái Nguyên hrŏ trun ƀu djơ̆ kơnong lĕ tơlơi yôm amăng bơwih ƀong huă-mơnuih mơnam đôč ôh mơ̆ lĕ akŏ phun kiăng kơ pơjing hăng pok pơhai hơdôm jơlan hơdră djuai ania amăng rơwang pơ anăp dong. Ơi Đỗ Danh Huân, Kơ-iăng Khua jơnum min mơnuih ƀon sang tơring glông Đồng Hỷ, Thái Nguyên brơi thâo kơ hơdră bruă amăng ƀon lan.

“Ƀing gơmơi đing nao pơplih tơlơi pơmĭn mơng neh met wa, kơ bruă pơklaih mơng ƀun rin, hrưn đĭ tơlơi hơdip kơ mơnuih ƀon sang, mă yua klă djop rơnoh prăk djru hăng man pơdong plơi pla kiăng kơ pơklaih mơng ƀun rin”.

Hluai tui hơdôm tơlơi lăi pơthâo mơng djop plơi pla kơ bruă jŭ yap glăi kual mơnuih djuai ania ƀiă hăng kual ataih asuek tui hơnong pơkă hơmâo ba tơbiă amăng Tơlơi pơsit mrô 33/2020/QĐ-TTg mơng Khua dêh čar, Jơnum min djuai ania hơmâo čih glăi hơdôm plơi pla tơnap tap hloh kiăng kơ hơmâo pơtrun tơlơi pơsit ngă akŏ phun mă yua, pơphun ngă tui hơdôm hơdră bơdjơ̆ nao amăng rơwang thun 2021-2025.

Phrâo anai, lơ 16/9/2021, Khua ding jum, Khua Jơnum min djuai ania hơmâo kĭ hră pơsit mrô 612/QĐ-UBDT tŭ yap mrô jŭ yap 13.222 boh plơi pla tơnap tap hloh, amăng anun hơmâo 11.179 boh plơi pla amăng să kual III, 736 boh plơi pla amăng să kual II; 1.184 boh plơi pla amăng să kual I hăng 123 boh plơi amăng hơdôm să kual mơnuih djuai ania ƀiă hăng kual ataih, asuek amăng 41 boh tơring čar, ƀon prong. Amăng hrơi blan pơphun ngă tui, tơdah hơmâo pơčlah, pơmut, brơi pơdơi ƀudah pơplih anăn, Jơnum min mơnuih ƀon sang tơring čar git gai djop gơnong bruă, anom bruă bơdjơ̆ nao pel ĕp, pơsit tong hơnong pơkă hăng ngă hră pơ-ar tui hăng tơlơi pơkă amăng tơlơi pơsit mrô 33/2020/QĐ-TTg lơ 12/11/2020 mơng Khua dêh čar mơ-it Jơnum min djuai ania pơƀut glăi, sem lăng hăng pơsit pơplih pơkra glăi. Tơlơi pơsit anai dưi ngă tui dong mơng hrơi kĭ hăng plih hĭ tơlơi pơsit mrô 433 lơ 18/6/2021 mơng Khua ding jum, Khua jơnum min djuai ania hăng tŭ yap hơdôm plơi pla tơnap tap hloh amăng kual mơnuih djuai ania ƀiă hăng kual ataih, asuek rơwang thun 2021-2025.

Siu Đoan: Pơblang