VOV4.Jarai-Ngă tui tơlơi git gai mơ̆ng Khua dêh čar, Anom bruă Kơnuk kơna dêh čar phrâo ngă hră pơtrun kơ bruă jŭ yap mrô čơđai muai drit druai yua klin covid 19 ngă hăng rơkâo ĕp hơdră pơ anăp anai pơgang ba anăm lui čơđai drit druai pơpă ôh kơƀah tơlơi lăng ba, wai lăng, pơgang brơi. Hră pơtrun mơ-it kơ Ding jum Bruă mă Tơhan rơka hăng Mơnuih mơnam, lăi rơđah:

Klin Covid 19 hơđuh glăi tal 4 ƀơi Việt Nam, hơmâo kman Delta ƀă hmar laih anun hŭi rơhyưt hloh, ngă bơbeč truh kơ tơlơi suaih pral, hơdip mơda mơnuih ƀôn sang, boh nik ñu lu sang anŏ rơngiă abih amĭ ama, čơđai muai jing drit druai, ƀu hơmâo mơnuih lăng ba ƀu hơmâo phung wang kơnung djuai jĕ giăm. Anom bruă kơnuk kơna rơkâo Ding jum Bruă mă Tơhan rơka hăng Mơnuih mơnam ngă hrom djop tơring čar, ƀôn prong jŭ yap glăi mrô čơđai muai drit druai, čơđai djai amĭ ƀudah ama, ƀudah djai abih amĭ ama yua klin Covid 19 ngă kiăng hơmâo hơdră rơkâo đĭ pơ anăp anai, anăm lui čơđai drit druai anun kơƀah tơlơi lăng ba djru hrom, khom hơmâo jơlan hơdră djru sui thun, hlom bom, djơ̆ găl klă hloh kơ ƀing čơđai ană arăng drit druai yua klin prong Covid 19 ngă.

Nay Jek: Pơblang