VOV4.Jarai - Ngă tui tơlơi pơsit mrô 04 lơ 19 blan 8 thun 2016 mơng Ping gah tơring čar Kontum tal XV kiăng tŏ tui pơjing hơdôm să tơnap tap amăng rơnuk phrâo, hơmâo pơpha ngă giang mah, djru brơi hơdôm să tơnap tap Văn Lem, tơring glông Đăk Tô, 5 thun laih rơgao hơmâo pơphun ngă tui bruă jao, Keh prăk wai lăng hăng pơđĭ kyar glai rưng tơring čar Kontum hơmâo lu bruă mă sit nik, tŭ yua amăng bruă djru hơdôm să ngă giang mah wai pơgang hăng pơđĭ kyar glai rưng.

Lơ 18/6 laih rơgao, ngă tui Jơlan hơdră mơng keh prăk wai lăng hăng pơđĭ kyar glai rưng tơring čar Kontum kơ bruă djru, pơjing să ngă giang mah Văn Lem, tơring glông Đăk Tô, sa amăng hơdôm grup mă bruă mơng sang keh prăk hơmâo pơpha gum hrŏm hăng Ping gah, Jơnum min mơnuih ƀon sang să pơphun mông ngă lơphet pok pơhai hơdră “Tết pla kyâo pioh hơdor na nao Wa Hồ” thun 2021. Mông ngă lơphet pơphun yôm phăn ƀơi sang drông plơi Măng Rương, hơmâo lu mơnuih ƀon sang nao jơnum hrŏm. Amai Y Bé, Khua apăn bruă khul hlăk ai mut phung plơi Măng Rương brơi thâo:

“Kâo hok mơ-ak biă mă hrơi anai hơmâo khul hlăk ai hrŏm hăng plơi pla, să tum pơƀut kiăng kơ pla kyâo tơlơi anai amra ba glăi tŭ yua tơdơi anai. Hơmâo kyâo hơ-ui plơi pla amra hơmâo ia yua”.

Amăng mông ngă lơphet pok pơhai hơdră “Tết pla kyâo pioh hơdor na nao kơ Wa Hồ” thun 2021, Keh prăk wai lăng hăng pơđĭ kyar glai rưng tơring čar Kontum hơmâo ƀơk Ping gah, gong gai hăng mơnuih ƀon sang să Văn Lem 300 phun kyâo hngo 3 pok hla, anai djuai 2 thun kiăng kơ pla kơtuai tui jơlan glông, jum dar sang drông amăng djop plơi pla mơng anun amra ngă anih dŏ hơdip mơtah mơda-agaih-hiam. Ƀing apăn bruă mơng Grup mă bruă Keh prăk nao pơtô brơi mơnuih ƀon sang tong ten bruă pla hăng wai lăng phun hngo brơi bluh đĭ hiam. Ơi A Hùng, Khua Jơnum min mơnuih ƀon sang să Văn Lem brơi thâo, tơlơi yôm phăn hloh lĕ mơng bruă mă tui anai, ngă kơ mơnuih ƀon sang amăng să thâo amăng bruă pla wai lăng glai rưng:

“Amăng hơdôm thun pơphun truh ră anai neh met wa amăng să Văn Lem lêng abih pran jua amăng bruă wai pơgang glai rưng, Gơgrong amăng djop mơta, djop bruă bơdjơ̆ nao wai lăng glai rưng. Juăt hyu pel ĕp kiăng kjăp anih arăng jao wai lăng. Sit biă ñu ră anai hơmâo tơlơi črâo trun mơng tơring čar, tơring glông kơ bruă pla kyâo pơtâo amăng să Văn Lem, anai lĕ bruă mă yôm phăn kiăng pla glăi kyâo glai ƀơi hơdôm kual lŏn thơ̆ thă ƀu hơmâo kyâo amăng să Văn Lem. Neh met wa kah hăng hlăk ai amăng djop plơi pla lêng abih pran jua amăng bruă wai lăng glai rưng kah hăng bruă pla kyâo pơtâo”.

Djru brơi să ngă giang mah Văn Lem amăng bruă mă, lĕ ngă tui hơdră apah prăk djru wai pơgang glai rưng, rĭm thun Keh prăk wai lăng hăng pơđĭ kyar glai rưng tơring čar Kontum hơmâo akŏ pơjing grup hyu mă bruă yua Khua keh prăk ngă Khua git gai pơtô brơi gong gai să pel ĕp amăng bruă jŭ yap glăi, tŭ yap bruă apah prăk wai pơgang glai rưng; wai lăng bruă mă yua, apah prăk djru wai pơgang glai rưng; pơjing hră pơ-ar jao lŏn glai wai lăng brơi djop sang anŏ, ƀing mơnuih, djop plơi pla. Ơi Hồ Thanh Hoàng, Khua keh prăk wai lăng hăng pơđĭ kyar glai rưng tơring čar Kontum brơi thâo, mơng bruă dju mơng Keh prăk, bruă wai lăng glai rưng amăng să ngă giang mah hơmâo pơphun klă ƀiă yơh. Mơnuih ƀon sang thâo rơđah kơ tơlơi yôm hăng  tơlơi tŭ yua sit nik mơng bruă wai lăng, pơđĭ kyar glai rưng:

“Mơnuih ƀon sang hơmâo pơplih tơlơi pơmĭn. Hlâo adih mơnuih ƀon sang wai pơgang glai rưng aka ƀu gơgrong đơi ôh. Ră anai mơnuih ƀon sang hlơi hlơi lêng abih pran. Neh met wa hluh bruă wai lăng glai rưng amra tŭ mă prăk apah. Wai lăng glai kyâo klă kiăng kơ hơmâo arăng apah prăk wai pơgang glai lu hloh. Mơng rơnoh prăk apah wai lăng glai rưng pơgôp ngă jơnap tui tơlơi hơdip kơ mơnuih ƀon sang”.

Ăt tui tơlơi črâo ba, pơtô brơi boh thâo mơng Keh prăk wai lăng hăng pơđĭ kyar glai rưng tơring čar Kontum, mơnuih ƀon sang 4 ƀut plơi pla amăng să Văn Lem, tơring glông Đăk Tô hơmâo pok pơhai ngă tui hơdră djru amăng glai kyâo pơtâo amăng lŏn hmua, hơdôm kơčong čư̆, hơdôm kual lŏn krêng krơng pơtâo 123 ektar mơng rơnoh prăk apah wai pơgang glai rưng amăng să. Akŏ bruă anai djru brơi mơnuih ƀon sang să Văn Lem hơmâo bruă mă, đĭ tui prăk pơhrui, pơgôp pơklaih mơng ƀun rin mơng anun ngă pơgiong tui hơnong pơkă pla phrâo 15.000 ektar glai rưng mơ̆ Tơlơi pơsit mơng Jơnum Ping gah tơring čar Kontum tal XVI ba tơbiă. Tơlơi ngă hok mơ-ak hloh lĕ hrŏm hăng glai rưng, ră anai 4 ƀut plơi pla amăng să Văn Lem lêng kơ jao wai lăng glai rưng soh hăng 5.000 ektar đang glai yua să wai lăng. Mrô prăk apah wai lăng glai rưng mơ̆ ană plơi pla tŭ mă rĭm blan djru brơi mơnuih ƀon sang hơmâo dong prăk pơhrui mơng anun amra dưi pơphun jai lu tui bruă mă yôm phăn amăng plơi pla.

Siu Đoan: Pơblang